Everton-in 4-0 zet a Manchester City an hneh kha club record thar a ni. Tom Davies leh Ademola  Lookman-te kha kum 20 hnuai lam ve ve an ni a, League-ah Everton tan teenager ni chunga goal khung thei 16-na leh 17-na an ni a, player naupang goal khung hnemah Arsenal an tluk tep.

Inkhelh chungchang sawiin Koeman chuan, ”A hun takah goal kan thun kha kan vannei a, kha goal khan City tan harsatna a siam a, kan tan a pawimawh em em bakah tha takin kan khelh theih phah a ni,”a ti.

‘I game plan a ni sa reng em?’ ti a BBC palai zawhna chhangin Koeman chuan, ”Ni lo, khatiang inkhel kha chu a plan lawk theih loh. Inkhel ropui tak a ni a, second-half phei kha chu duhthusam a tha in kan khel a ni.

“Pep hmachhawn hi thil awl a ni dawn lo tih ka hre sa a, chuvanga formation ti danglam ka ni. Mahse second half kha chu kan khel tha thlawt a ni. First half-ah khan chance kan nei ve ve a, Team danglamna chu goal kan thun kha a ni. A hun takah kan thun a, second half-ah ka thun chhunzawm lehnghal avangin City tan chuan a harsa tawh niin alang, ”tiin City hmachhawn chu thil awl a ni tih a sawi.

Davies leh Lookman chungchang sawi chhunzawmin, “Davies kha kum 18 lek mah nise midfield-ah khan a khel tha em em a, a thawkrim a, chance tam tak siam theitu tur a ni. Midfielder goal thun thei tak tur niin ka hre hran lo a, mahse goal a thun a, kan khelmual a nih bawk avangin atan chuan hun duhawm bik a ni ang. Lookman pawhin a hun tlemte neih a hmang tangkai a, ka lawm tak zet. Anni pahnih goal khung khan kan chakna a nemnghet a, hnehna ropui tak a ni,”a ti.

Pep chungchang sawiin Koeman chuan,”Chak result an beisei ngei ka ring a, mahse kan vanneih tum a ni. Chakloh chang chu a awm tur alawm. Heng ang hun hi chu a tawng tawh thin a, Pep hian thil diklo awmte her rem turin theihna a nei a ni. Kha aia tha zawk khan an tho chhuak leh ang tih hi ka ring tlat. Manager ropui tak a ni a, rinhlelhna ka nei lo,”a ti bawk.