April ni 28, Zirtawp  khan Aizawl sipai lammualah K. Kawla U-19 Football Talent Hunt Tournament khuhhawnna hun hman a ni a,  Brig MS Mokha, DIG, 23 Sector, Assam Rifles chu khuallian a ni.  He Tournament hi May ni 1, Thawhtan atangin Aizawlah khelh tan a ni ang a, District Football Association pariat aiawh Hmeichhia leh Mipa in elna tur a ruahman a ni.

Khuallian Brig MS Mokha chuan Tournament lo pian chhuah dan sawiin, Ministry of Home Affairs hmalakna a nih thu leh Assam Rifles-in India hmarchhak state pali a inkhel thiam ber berte thlan chhuah kawngah tournament huaihawt hna an thawh dawn thu a sawi. Mizoram bakah Manipur, Nagaland leh Meghalaya-ah tournament hi buatsaih a ni a, player tha te chu India ram aiawha Asian championship-a tel tir an tum thu a sawi bawk.

Pu Mokha chuan tournament hi chhawng thum buatsaih a ni ang a, thawh khatna state level-a buatsaih a ni ang a,  thawh hnihna chu June thlaah Shillong-ah buatsaih a ni ang a, a thawh thumna chu Delhi-ah July thlaah  buatsaih a nih tur thu a sawi. Assam Rifles DIG chuan he tournament huaihawt tura Mizoram Football Association an thawhpui thei leh, thil tih tur tul engkim phur taka hma an lak a vanga lawmawm a tih thu a sawi tel bawk.

Pu Lalnghinglova Hmar, MFA Honorary Secretary chuan Mizo thalaite thiamna phaw chhuak tura Assam Rifles nen an thawk dun thei chu lawmawm a tih thu sawiin,  Nikuma Assam Rifles All-star team leh MPL team in friendly match an khelh thu leh IGAR tournament-a Assam Rifles Mizoram football team an zu champion thu te sawiin player engemawzat sipai an nih tur thu a sawi lang bawk.

Mizote zinga India ram aiawha football khel hmasa ber K. Kawla hmingchawia buatsaih tur Talent Hunt tournament-ah hian Mipa team 8 leh Hmeichhe team 8 te chu Pool A-B ah then hran an ni a. Mipa Pool A-ah Serchhip, Siaha, Lunglei leh Kolasib te awmin Pool B-ah Mamit, Aizawl, Champhai leh Lawngtlai an awm thung.  Hmeichhia Pool A- ah Mamit, Lawngtlai, Aizawl leh Siaha awmin Pool B-ah Serchhip, Champhai, Lunglei leh Kolasib te an awm thung a ni.

(adsbygoogle = window.adsbygoogle || []).push({});