F.Tlangsiama Memorial Judo Championship 2018 chu Mizoram Judo Hal, Zemabawk North-ah khelh tan a ni a, June ni 7, Ningani chawhma dar 11:00 khan C.Laltlanthanga, Secretary Mizoram State Sports Council chuan a hawng.

He Championship hi June 8, Zirtawpniah final khelh tur a ni a,  Mizoram hmun hrang hrang atangin club 7 telin Mipa 50 leh Hmeichhia 44 an vaiin players 94 an tel a ni. 

Championship hawngtu C.Laltlanthanga, Secretary, MSSC chuan, ''Famta F.Tlangsiama kha Mizoram Judo-a hmahruaitu a ni a, kei chuan Father of Mizoram Judo-ah ka ngai. Judo thiam tak a ni a, chu mai ni lovin coach ropui tak, mite zirtir thiam em em mai a ni. Judi thiam apiangin Pu Tlangsiama Judo thiam zia an hria' a ti.

Khual lian chuan, " Judo hi game thianghlim a ni a, player te pawhin kan nunpui a ngai. Judoka tha tak ni tur chuan thuawih thei nih a ngai a, kan taima em em tur a ni bawk. Tin, buaina siamtu ni lovin mite thlamuantu zawk kan nih a ngai bawk" tiin MJA hnuaia Judoka zawng zawngte an kal zelna turah duhsakna a hlan.

F.Tlangsiama Memorial Judo Championship hawnna inkhawm hi K.Lalhmachhuana, Vice President, Mizoram Judo Association chuan a kaihruai a, he hun hi F.Tlangsiama tu leh faten an hmanpui a ni.

(adsbygoogle = window.adsbygoogle || []).push({});