Jr NBA World Championship neih mekah India hmeichhe team te chuan South American team te chu an hneh.
Orlando khawpuiah Under-14 Jr NBA World Championship chu neih mek a ni a, India team te hi pool match vawi hnih an khelh tawhah an la chak lo ve ve a, an match hnuhnung berah South America nen hian an inkhel a, India hi 40-37 in an chak a ni.
Walt Disney World Resort chhunga ESPN Wide World of Sports complex-a tournament an khelhah hian India chuan a hmasa berah Asia-Pacific team an hmachhawn a, an chak lo phawt a. An match hnihnaah Europe nen an inkhel leh a, India hi an tlawm leh bawk a, match thumnaah South America hi an hneh ve hlauh a ni.
First quarter-ah India hian 12-9 in hma an hruai nghal a, second quarter-ah 14-13 in hma an hruai leh a, third quarter-ah pawh 7-6 in India hian hma an hruai leh bawk a, fourth quarter-ah erawh South America hian 7-9 in hma an hruai ve thung a. Hun tawpah India hi a dingchang zawkah an tang ve hlauh a ni.
India tan hian Sunishka Kartik chuan point 17 a score a, South America tana thun hnem ber chu point 13 thuntu Josefina Balatti a ni.
India mipa team te chu an che fuh hleithei lo a, South America nen tho intumin India hi 49-56 in an chak lo a. He tournament-a international bracket bikah hian team pariat an tel a, pool hnihah inthenin pool khatah hian team 4 zel an awm a. Pool pahniha team 8 te hian pool match-ah record nei chhe viau pawh ni se knock-out stage an lut vek tho a. Heti a nih avang hian India mipa leh hmeichhe team te hi knock-out stage khel tur hian an tling ve ve tho a ni.
US bracket-ah pawh team 8 tho an awm a, international bracket nen hian a kalphung chu a inang chiah a, team 8 te hian knock-out stage an thleng vek a. A tawpah US bracket champion leh international bracket champion te chu an inhmachhawn dawn a, champion pahnih hian Pathianni khian World Championship match an khel dawn a ni.
Naktukah skill challenge leh three-point challenge an nei dawn a, hetah hian India aiawhin mipa pathum leh hmeichhia pahnih an tel dawn a. Bhavik Garg leh Dinesh Pal te chu mipa skill challenge-ah an tel ang a, Moumita Mishra chu hmeichhe skill challenge-ah a tel ang a. Three-point challenge-ah Jeevanshu Khatri chu mipa aiawhin a tel ang a, Sunishka chu hmeichhe aiawha tel tur a ni.