June ni 8, Ningani khan Central YMA leh Mizoram Football Association (MFA) tangkawpin an buatsaih TT Royte Trophy Inter Branch YMA Football Tournament 2017 Round of 16 khelh zawh a ni a, inkhel vawi hnih awmin Hualngohmun leh Chanmari chuan an khingpui ve ve hnehin quarter final an lut ve leh ta a ni.

June ni 12, Thawhtanah quarter final khelh tan tur a ni a, inkhel vawihnih a awm ang a, inkhel hmasa zawk chawhma dar 11:00 AM-ah Ramhlun South leh ITI in an khel ang a, chawhnu dar 1:30 PM-ah Chhinga Veng leh Salem Veng ten an khel thung ang.

Quarter Final lut te: 1. Ramhlun South 2. ITI chuan 3. Chhinga Veng 4. Salem Veng 5. College Veng 6. Chaltlang 7. Hualngohmun 8. Chanmari

11:00 AM Republic Veng 2-3 Hualngohmun

(Lalmalsawmtluanga 8', 66') (Lalnunhlua 24', Vanlalthanga 46', Lalneihkima 79')

Inkhel hmasa zawkah Hualngohmun chuan 3-2 a Republic hnehin quarter final an lut ta a ni. Inkhel tan a ni a, Republic Veng chuan nawr nghalin minute 8-ah F Lalrinpuia (Valpuia) ball pek chu Lalmalsawmtluanga chuan box-ah la lutin goal hmahruai a khung a, Hualngohmun chuan nawr let ve nghalin minute 24-ah mual dinglam sir a tang a Vanlalthanga ball vawr luh chu box chhunga awm Lalnunhlua chuan cool tak a pet goal-in an siphurh a rul a, goal dang luh belh tawh lovin 1-1 in chawlh lawk an hmang ta a ni.

Second half tan a tang a minute 1 aral hmain Vanlalthanga chuan Hualngohmun tan an goal hnihna a khung nghal a, Republic Veng chuan an siphurh sut tumin an nawr let thung minute 66-ah Lalthantluanga (T2-a) ball vawrh luh tha zet chu Lalmalsawmtluanga bawk chuan tauh lutin an siphurh a rul leh a, Hualngohmun chuan nawr let ve thungin minute 79-ah Lalneihkima chuan an goal thumna a khung ve leh a, Republic Veng chuan an siphurh sut ngei tumin counter attack-in nawr mahse goal an thun thei tawh lo. Hualngohmun chuan 3-2 in Hnehna an chang ta a ni.

01:30 PM Chanmari 3-0 Republic Vengthlang

(Rosangliana 25', Jerry Mawihmingthanga 39', 41')

Inkhel hnuhnung zawkah Chanmari chuan si thum fai a Republic Vengthlang hnehin quarter final an lut ve bawk. Chanmari tan Jerry Mawihmimgthanga chuan goal hnih a khung a, Rosangliana chuan goal khat a khung ve thung. Goal lut te hi first half-a lut vek an ni a, inkhel tan a tang a minute 15-ah Rosangliana chuan Chanmari tan goal hmahruai a khung a, minute 39-ah Jerry Mawihmingthanga chuan an goal hnihna a khung hnu minute 2 aral leh hmain Jerry Mawihmingthanga bawk chuan an goal thumna a khung leh nghal zat a Chanmari chuan 3-0 in hnehna an chang ta a ni.

June ni 12, Thawhtanni Quarter Final Fixtures

11:00 AM Ramhlun South vs ITI Veng

01:30 PM Chhinga Veng vs Salem Veng

(adsbygoogle = window.adsbygoogle || []).push({});