June ni 7, Nilaini khan Central YMA leh Mizoram Football Association (MFA) tangkawpin an buatsaih TT Royte Trophy Inter Branch YMA Football Tournament 2017 Round of 16 khelh chhunzawm a ni a, inkhel vawi hnih awmin College Veng leh Chaltlang chuan an khingpui ve ve hnehin quarter final an lut ve leh ta a ni. June ni 8, Ninganiah khelh chhunzawm leh tur a ni a, quarter final lut a hriat khim tawh ang.

Quarter Final lut tawh te: 1. Ramhlun South 2. ITI chuan 3. Chhinga Veng 4. Salem Veng 5. Durtlang Leitan 6. Chaltlang

11:00 AM : Durtlang Leitan 2-4 College Veng

(Lalremliana 33', MS Dawngliana 76')  (Riky Rohmingliana OG 2', Zothanmawia 14', Edenthara 16', R Laldanmawia 55')

Inkhel hmasa zawkah College Veng chuan 4-2 a Leitan hnehin quarter final an lut ve leh ta a ni. Inkhel tan a ni a, College Veng chuan an nawr nghal a, minute 2-ah Leitan defender Riky-a chuan an lamah a tauh goal hlauh. College Veng chuan nawr chhunzawm zelin Minute 14-ah B. Zoramthara corner pet chu box chhunga awm T. Mawia chuan College Veng tan an goal hnihna a tauh goal-a minute 2 aral leh hmain Edenthara chuan an goal thumna a khung leh nghal zat bawk. Leitan chuan an siphurh sut tumin an nawr let thung. Minute 33-ah Lalremliana chuan an goal khatna thun mahse, College Veng chuan 3-1 a hmahruaiin chawlh lawk an hmang ta a ni.

Second half tan a ni a, minute 10 aral hmain Danmawia chuan College Veng tan an goal li na a khung a, Leitan tan minute 76-ah MS Dawngliana (Valpuia) chuan an goal hnihna khung ve bawk mahse, goal dang an thun belh thei tawh lo. College Veng chuan 4-2 in hnehna an chang ta a ni.

01:30 PM Bawngkawn 3-4 Chaltlang

(Lalhmunsiama 10', H Lalmuankima 30', MS Dawngliana 60') (Malsawmzuala 42',(p) PC Lalhriatpuia 45', 68', Malsawmzuala 79')

Inkhel hnuhnung zawkah Chaltlang chuan 4-3 a Bawngkawn hnehin quarter final an lut ve bawk. Inkhel tan a ni a, Bawngkawn chuan inkhel thu nun zawkin minute 10-ah mual dinglam atanga Mka ball vawrh luh tha zet chu box chhunga awm Hmunsiama chuan tauh lutin goal hmahruai a khung a, Chaltlang chuan an siphurh sut tumin nawr ve bawk mahse, goal erawh an thun mai thei lo. Minute 30-ah Bawngkawn tan Mka chuan an goal hnihna a khung leh bawk. Chaltlang an beidawng lo. An siphurh sut ngei an tum ruh hle; hun tawp nan minute 3 ala awmin goal hnih lai an khung hman. PC Lalhriatpuia penalty hlawh chhuah chu Malsawmzuala chuan a pet goal hnuah PC Lalhriatpuia chuan an siphurh sutna goal a khung a, 2-2 in chawlh lawk an hmang ta a ni.

Second half tan a ni a, Bawngkawn chuan inkhel thu nun zawkin minute 60-ah Dawngtea chuan an goal thumna a khung leh a, Chaltlang chuan an siphurh sut tumin an nawr ve bawk. Minute 68-ah Lalramhmunmawia ball pek tha zet chu PC Lalhriatpuia chuan box-ah la lutin cool takin an siphurh sutna goal a khung leh ta a ni. Chaltlang an phur thar minute 79-ah Malsawmzuala goal shout chu Bawngkawn keeper MC Lalneihsanga chuan a teh sual hlauh ho takin a goal a, Chaltlang chuan 4-3 in hmaanhruai thung.  Bawngkawn chuan an siphurh sut tumin counter attack-in nawr mahse goal an thun thei tawh lo. Chaltlang chuan 4-3 in hnehna an chang ta a ni.

June ni 8, Ningani Fixtures

11:00 AM Republic Veng vs Hualngohmun

01:30 PM Chanmari vs Republic Vengthlang

(adsbygoogle = window.adsbygoogle || []).push({});