Paul Pogba-a’n penalty a chawi chu James Milner-a’n pet goalin hun tawp dawnah Zlatan Ibrahimovic chuan a sut chauh a, Manchester United leh Liverpool-te chu Old Trafford-ah 1-1 in an inhneh tawk. He inkhel hi a hmuhnawm a, club inhal tak an nih avangin a boruak pawh a sang viau mai. Paul Pogba, Ander Herrera leh Roberto Firmino-te tang lutuk-te leh Simon Mignolet-a khel tha lutuk kha inkhel ti hmuhnawmtu an ni awm e.

Manager tawngkam thiam leh duh tui lem lo tak Mourinho chuan Sky Sports kaltlang in,”Inkhel hmuhnawm tak a ni a, ka pawm thlap e. Mahse inkhel quality hniam tak a ni, inkhel class sang tak a ni lo. Kha aia tha khan team pahnih te hian an khel thei tih ka chiang a ni,”tiin inkhel quality sang tak a nih loh thu a sawi.

“A nawrtu zawkah kan tang a, goal chance kan siam bawk avangin a hmuhnawm ka ti. Livepool khan defensive takin an khel a, an hlawhtling hle bawk a, kha kha hmuh nuam ka ti bawk.

“Liverpool-in min nawr let dan a fuh thei hle a, chuvangin game ka thlak a, khami hnu kha chuan lehlam tan harsatna kan siam hnem lehzual.

“A nawr bettu zawk kan ni a, Liverpool khan defence chiah tih theih an nei tluk a ni. Chak phu zawk kan niin ka hria a, chutihrual chuan kan point in semah erawh kan lungawi ve ve a tul a ni.

“Kan chak tluang lai min chelh ding a, mahse tlawm hmel erawh kanla hmu lo tluang zel,”tiin a khel tha zawk an nih thu a sawi.

United fan-ten a an ngei rawn thin Maroune Fellaini chungchang sawiin Mourinho chuan,”Fellaini hi a thatna leh that lohna lai kan thliar thiam a pawimawh. Hman dan a zirin kawng tam takah chuan player tha tak a ni.

Liverpool penalty box kha ka en a, kawr eng chiah hmuh tur a awm. Chuvang chuan sut tlang a har dawn tih ka hria a, ball vawrh luh tawp kha tha berin ka hria a ni a, Fellaini inlan hun a ni bawk.

“Game kan thlak hnuah khan hun nei tam deuh ila chuan kan chak ngei ka ring,”tiin a sawi zui bawk