Tennis star pahnih Novak Djokovic leh Serena Williams-te chuan 2016 Laureus Sportsman leh Sportswoman of the Year awards an dawng.
Khawvela sports award ropui ber semna hi Berlin-ah neih niin, American actor Bill Murray chuan a host a. Djokovic leh Serena te hian khawvela infiamna lawmman zinga mite hlut ber hi a vawi thum nan an dawng ta a ni.
Serbian Djokovic hian nikum leh 2012 khan he lawmman hi a lo dawng tawh a, American Williams hian 2003 leh kum ruk liamta khan a lo dawng tawh bawk a ni.
Novak leh Serena te hian nikum chhung khan Grand Slam Singles Title 3 ve ve an la a, Novak hian Barcelona forward Lionel Messi leh tlanchak Usain Bolt-te khumin he lawmman hi a dawng a ni. Serena Williams hian footballer Carli Lloyd leh Jamaican tlanchak Shelly-Ann Fraser-Pryce te a khum bawk a ni.
Kum 21 mi golfer Jordan Spieth chuan Masters leh US Open a lak avangin Breakthrough of the Year award hlan a ni a. New Zealand Rugby team chu Team of the Year-a thlan an ni bawk.
March thlaa cancer vanga boral ta Dutchman Johan Cruyff chu Spirit of Sport award hlan a ni a, he a lawmman hi a fapa Jordi chuan a lak sak a ni.