FIFA Under-17 World Cup khelh mekin India-ah a țha lamin nghawng a nei zel a, sulhnu țha tak hnutchhiah theihna hun a awm mek.
World Cup hi a hmawrbawk țep ni tawhin game hnih chiah khelh hmabak a awm tawh a, Final bakah pathumna inchuh inkhel (third place match) ala awm.
GOAL LUH TAMNA BER A NI DAWN?
Intihsiakna kal mekah hian game 50 khelh tawh niin goal 170 lai a lut tawh a, Under-17 World Cup chanchina goal luh tam ber țum chu kum 2013-a United Arab Emirates (UAE)-in an thlen khan a thleng a goal 172 a lut.
Kum 2013 Under-17 World Cup-a goal lut zat hi kuminah hian an khum ngei beisei a ni a, goal hnih lekin a inthlau tawh a game hnih la awmah hian goal hnih aia tam a luh chu a beiseiawm.
Game khata goal lut zat (number of goals scored per match)-ah pawh hun hmasa lam ami phak theih ni dawn lo mahse team tel thei tihpun hnua record țha ber erawh India-ah a thleng tawh a, tun thlengin game khata goal lut zat hi chawhrualin 3.4 goals a ni.
Under-17 World Cup-ah bik game khata goal lut zat tamna ber chu kum 1997 (Egypt) leh kum 2003 (Finland)-ah khan a thleng a, hetiang hunlai hian team tel theizat 16 an la ni a match 32 chiah ala awm bawk.
Kum 1997 leh kum 2003 Under-17 World Cup-ah hian goal 117 a lut a, chawhrualin game khatah goal 3.66 ang zel a lut.
ENTU TAMNA BER RECORD SIAM A NI DAWN
Goal lut tam ber record bakah hian Under-17 World Cup-a entu tam ber record pawh India-ah siam ani ngei dawn niin a lang.
Kum 1985-a China-in Under-17 World Cup hmasa ber an thlen khan belhkhawmin entu zat chu 12,30,976 an ni a, India-in a thlen mekah hian belhkhawmin entu zat hi mi 12,24,027 an tling tawh a, kum 1985-a entu zat nen an inthlauhna hi 6,949 chauh ni tawhin game hnih la awm hian a khum ngei ang.
Kum 2011-a Mexico-in he intihsiakna hi an thlen khan entu zat belhkhawm chu 10,02,314 an ni a, hei hi India-in a khum tawh a Mexico hi Under-17 World Cup chanchina entu zat belhkhawmin maktaduai khat (million) a pelh țum thumnaah a tla thla tawh.
India-in Under-17 World Cup hi kan hlut hle a ni tih a lan chianna pakhat chu October ni 18-a Round of 16 an khelh zawh khan entu zat belhkhawm chuan maktaduai khat a pel der tawh.
India-ah hian entu zat belhkhawm hi tam tawh viau mahse chawhruala game khat entu zatah erawh kum 1985 ami a phak theih dawn lo thung a, hei hi a chhan chu China-in an thlen hunlai hian team tel an tlem a tunah chuan team tel thei zat hi tihpun a ni tawh.
Kum 2005-a Peru-in an thlen thleng khan team 16 chiah an tel thei a, hetih hunlai hi chuan FIFA U-17 World Championships ti a vuah ala ni nghe nghe.
Kum 2007-a South Korea-in an thlen dawn khan team tel thei zat hi tihpun niin team 24 tel theihin siam danglam a ni a, match zat pawh match 32 ni țhin kha match 52-ah a kaichho.
India bikah chuan chawhruala entu tamna ber chu Vivekananda Yuba Bharati Krirangan a ni a, 'Salt Lake Stadium' ti a hriatlar zawkah hian game kua (9) khelh tawh niin entu zat belhkhawm chu 4,85,693 an tling tawh a, chawhrualin game tinah entu hi mi 53,965 an awm ziah ang a ni.
INDIA-IN WORLD CUP A NGAIHLU
FIFA Under-17 World Cup hi India mipuite'n an hlut tih a chianna pakhat chu, semi-final-a Brazil leh England inkhelhna tur Guwahati ațanga Kolkata-ah an sawn khan ticket an inchuh nasa hle a, internet ațanga ticket leina tur FIFA-in an website-a an siam chu a buai phah hial!
Brazil leh England inkhel en duh mipui maktaduai khat zet chuan FIFA website atangin lei an tum a, ticket kha India sanaa zan dar 8:30-ah zawrh țan niin minute 10 chhung lekin lei duh hi mi 95,000 an tling hman.
FIFA chuan ticket lei tum mi tam takin hunrei zawk an nghak chu pawi an tih thu leh ticket changlote hriatthiamna an ngen thu an sawilang a, ticket hralh zawh anih thu an tarlan bakah ticket lei thei leh chang ve ta lo te chungah Under-17 World Cup an ngaihhlut avangin lawmthu an sawilang bawk a ni.
FIFA UNDER-17 WORLD CUP FINAL
ENGLAND vs SPAIN
A hun: 28th October (5:00pm)
A hmun: Vivekananda Yuba Bharati Krirangan, Kolkata
Live-na tur: Sony LIV, Sony ESPN, Sony ESPN HD, Sony Ten 2, Sony Ten 2 HD, Sony Ten 3, Sony Ten 3 HD.
* Pic: Sportswallah