Mizoram Premier League Season 6 Phase 2 Round 12 na match hnuhnung ber chu November ni 1, Nilaini zan khan MPL champion hmasa ber Dinthar FC leh I League champion Aizawl FC ten an khel a, Aizawl FC chuan 4-0 in Dinthar FC an sawp. Aizawl FC tan David Lalrinmuana, H Lalmuankima, Masih Saighani leh William Lalnunfela te chuan goal khat theuh an khung a, H Lalmuankima chu Man of the match-ah thlan a ni.

(adsbygoogle = window.adsbygoogle || []).push({});

Phase 1 Round 6-ah team pahnih te hi in hmachhawn tawhin Aizawl FC hian 3-0 in hnehna an chang tawh a, an intawn vawi hnihnaah pawh Aizawl FC bawk an chungnung leh ta a ni.

Dinthar FC 0-4 Aizawl FC

(David Lalrinmuana 9', H Lalmuankima 22', Masih Saighani 27', William Lalnunfela 80')

Dinthar FC hian coach thar Vanlalrova hnuaiah match li a zawnin an chak tawh lo a, khelh tawhah vawi hnih hnehna chang tawhin vawi sarih an tlawm tawh a, vawi hnih draw neiin point 8 an nei a, table mawngphah an luah lum mek a ni.

Aizawl FC hian Portuguese coach Paulo Meneses hnuaiah match li hnehna an chang zawn tawh a, khelh tawhah vawi ruk hnehna chang tawhin vawi li draw an nei a, vawi hnih an tlawm tawh thung. Point 22 nei tawhin table-ah pahnihna an hauh mek a ni.

First hlaf-ah goal thum lai a lut a, goal hmasa ber hi minute 9-ah David Rinmuana chuan freekick atangin mawi takin a chhuih lut a ni. Aizawl FC hian inkhel thunun zawkin goal thun belhna hun tha an neih chhunzawm a, Minute 22-ah Romanian midfielder Andrei Ionescu ball pek fing tak chu Mka chuan goal-ah chan tirin an goal hnihna a khung a, minute 5 aral leh hmain David Rinmuana corner pet tha zet chu box chhung a awm Afghan defender Masih Saighani chuan tauh lutin an goal thumna a khung zui leh bawk.

Second half-ah Dinthar FC  coach Vanlalrova chuan Samuel-a, Lalmalsawmtluanga leh Saihmingthanga te luh tir mahse, danglamna erawh an thlen thei lo a, Lalthantluanga, Bikyson Kharkongor leh Samuel-a te chuan Aizawl FC tlarhnung an thiat thei lo.

Aizawl FC chuan an hun tha neih hmang tangkaiin minute 80- ah mual veilam sir a tang a, Mka ball pek tha zet chu box chhunga awm William-a chuan chiang zet a pet lutin an goal lina a khung zui leh a, goal dang luh belh tawh lo in Aizawl FC chuan 4-0 in hnehna an chang ta a ni.

November ni 10, Zirtawp tlai dar 3:00-ah Dinthar FC hian Mizoram Police FC an hmachhawn leh ang a, zan dar 7:00-ah Aizawl FC hian Chanmari West FC an hmachhawn thung ang.

(adsbygoogle = window.adsbygoogle || []).push({});