Siliguri-a I-League 2nd Division khelh mekah Mizoram club Aizawl FC an chungnung chho zel a, April ni 13, 2015 khan Kanchenjunga Stadium-ah Aizawl FC hian 4-2 in United FC an hneh a ni.
Mizoram club tho Chanmari FC erawhin an khingpui PIFA Sports chu 3-3 in an inhnehtawk pui a, Chanmari FC hian khelh 6 atangin draw vawi hnih leh chak loh vawi khat an nei tawh a, 11 points an nei mek a, table-ah pathumna an ni mek. Aizawl FC erawh hi chuan khelh 6 atangin an khingpuite an la hneh vek a, 18 points an nie a, league-ah hmahruaitu an ni mek.
Kanchenjunga Stadium, Siliguri-a Round 6 match-ah Aizawl FC an chak lo teuh hle a, an khingpui United SC chuan tan atanga minute 15 naah Rajon Barman hmangin goal an khung. Aizawl FC tan B Zoramthara chuan an si phurh 46th mins-ah a rul a. Aizawl FC hi insiamtha chho zel mahse 58 mins-ah Thomas Lalengkima chuan an lamah a ti goal hlauh mai, 2-1 in United SC in hma an hruai mek.
Mahse Aizawl FC tan vanneihna a lo thleng ve a, 73rd mins-ah Eze Kingsley chuan an lamah a tih goal ve avangin Aizawl FC chuan an si phurh an rul, 2-2 a ni ta. Hun tawp dawn minute 10 chhungin goal hnih an khung, Alfred Kemah Jaryan chuan 83rd mins-ah Aizawl FC hma a hruaipui a, bench atanga rawn lut Justice Morgan chuan 89th mins-ah goal 4-na khungin, 4-2 in Aizawl FC chuan hnehna an chang ta a ni.
Chanmari FC erawh bul tan tha hle mahse 3-3 in PIFA Sports an inhnehtawk pui a. Laldingngheta chuan tan atanga minute 8-na lekah Chanmari FC hma a hruapui. Second half 46th mins-ah Yarmipei Shangh chuan PIFA Sports si phurh a rul a, Sandesh Gadkari chuan PIFA Sports hma a hruaipui a, Mahse Lalbiakhlua chuan Chanmari FC si phurh a rul, 2-2 a ni.Pranay Daniell chuan 82nd mins-ah PIFA hma hruaipui lehin, 3-2 in PIFA hi an chak dawn emaw tih laiin hun tawp dawn added time-ah Joel Sunday chuan Chanmari FC si phurh a rul a, 3-3 in an inhnehtawk ta a ni.
Siliguri-ah hian Round 7 thleng khelh a ni dawn a, return leg erawh Golaghat, Assam-ah khelh a ni ang. Siliguri-a Round hnuhnung berah Mizoram club pahnih Aizawl FC leh Chanmari FC an inhmachhawn dawn a, April ni 19, 2015 (Ningani) hian Kanchenjunga Krirangan-ah chawhma dar 9:30-ah Mizoram club pahnihte hi an inhmachhawn dawn a ni.
United SC 2-4 Aizawl FC
(Barman 14', Thomas 58' OG) ( B Zoramthara 46', Kingsley 73' OG, Alfred 83', Justice 89')
Chanmari FC 3-3 PIFA Sports
(Laldingngheta 8', Lalbiakhlua 78', Joel Sunday 90+3') (Shangh 46',Sandesh 58', Daniell 82', )
Photo credit : Aizawlfc.com