Pre-season tour-ah che țha tawk lo mahse Bayern Munich chuan Bundesliga-a an game hmasa berah hnehna an chang nghal a, an khelmual Alianz Arena-ah 3-1 in Bayer Leverkusen an hneh.
Inkhel țan hmain Barcelona chhiatna thlenga thite sunna hun hman a ni a, minute khat chhung ngawi rengin an ding.
Bayern goal thum zingah pahnih hi an lei thar Niklas Sule leh Corentin Tolisso-te khung a ni a, an goal khat hi penalty ațangin Robert Lewandowski chuan a khung.
Lewandowski penalty hi Video Assistant Referee (VAR) hmanga ennawn anih hnuah pek an ni a, Bundesliga-ah hian VAR hi an hmang ve tawh dawn.
Bayern goal hmahruai khungtu Sule hian amah ang bawka Hoffenheim tana khel țhin Sebastian Rudy freekick pet ațangin minute kuanaah a tauh goal a, Sule leh Rudy hian tun nipui ațangin Bayern hi an zawm.
Lyon ațanga an lak thar Corentin Tolisso hun a thleng ve thung a, French midfielder hian minute 19-naah Arturo Vidal corner pet ațanga ball kal a tauh goal.
First half-ah Bayern hian goal hnih khung mahse Leverkusen pawh an khel chhe hran lo va, goal an khung thei lo erawh an inthlauhna lian tak a ni thung.
Second half an țan deuh chiah tihah Bayern-in penalty an hlawhchhuak a, Leverkusen midfielder Charles Aranguiz chuan an box chhungah Lewandowski a ti tlu.
Foul a awm hian inkhel enkawltu referee Tobias Stieler chuan VAR a rawn a, penalty hi pek zui niin a hlawhchhuaktu Lewandowski hian goal-ah a chantir.
Leverkusen lam hian minute 65-naah Admir Mehmedi hmangin goal khat an sut țhen a, goal thum nei tawh Carlo Ancelotti leh a naute hnehna turin a tawk lo.
Huntawp thlengin goal dang a luhbelh lo va an mualah 3-1 in Bayern Munich an chak.
Bundesliga bikah Bayern Munich hian Alianza Arena-ah a zawnin game 23 chhung chu hnehloh an tawng tawh lo va, kum 2016 March thlaa Mainz an hnehloh hnu khan game 23 hi an khel leh tawh a game 18-ah chakin game ngaah an tumpuite nen an inhnehtawk.
Poland striker Lewandowski hian Bundesliga-a a game hnuhnung 66 ațangin goal 61 a khung tawh bawk a ni.