2016/17 Hero I-League champions Aizawl FC-te chuan an khua Aizawl chu ropui takin May ni 1, 2017 khan an lut.
Guwahati atangin Lengpui Airport-ah Aizawl FC team hi an tum a, Aizawl City an panna kawngah kawng tluanin mipuiin an lo lawm a, Aizawl khawpui dung zawhin thil ri thei chi hrang hrang hmangin Mizo mipuite chuan an hero-te chu an lo lawm a ni.
Mizoram Football Association chuan Aizawl FC champion lawmna hi AR Lammualah a buatsaih nghal a, tlar dar 5:30-ah AR Lammualah lutin, stadium khat tlatin mipuiin champion team-te hi an lo lawm a ni.
Rev. Lalramliana, Sr. Executive Secretary, Mizoram Synod chuan hunserh hmangin , Lal Isua Kross kan chhuan zia leh sum tam tak aia Kross chhuangtu Aizawl FC chuan Kross hmanga hnehna an chan thu a sawi.
Lalnghinglova Hmar chuan thusawina hun nei chhunzawmin, "Pathian chu fakin awm rawh se, Sawi tur ka ngah, mahse sawi vek a remchang lo. Santosh Trophy-a kan champion-na leh National Games kan champion-na kawr kha ka rawn ha a, hetah hian a tawp hlen dawn emaw tih laiin I-League ah kan champion ta si a. (Tih pah chuan Aizawl FC jersey a hak chu a rawn pholang a)
"Hetiang kan tawng hi a mak ka ti a, a lawmawm ka ti a, a ropui ka ti. Pathian ropui ber rawh se.
"Kerala-ah Sub-junior championship-ah kan champion, kan naute an lo haw mek, naktukah juinior-ah semi final kan khel leh dawn. Kan hmasawnna hi a ropui a ni. Zone level, District FA, Mizoram chhunga Football club zawng zawng, zonet.. kan sawi seng lo.. an chungah lawmthu kan sawi. A hnuhnung berah chuan Mipuite chungah lawmthu ka sawi a ni." tiin a sawi.
Tetea chuan player-te chu mipui hmuhah a phochhuak a, hemi hnu hian a la duhtawk mai lo,
"Mizoram hi India ram chuan football thiam ram min ti reng tawh dawn. AIFF puipate'n thinlung takin min lawmpui. Hetih lai hian he hnehna hi kan chhunzawm a ngai dawn, a chhan chu tifuh palh niah min ngai dawn a ni. Thingtlang kilkhawr ber ber thlenga Football tana tha thawhtute atanga Football ngainatu zawng zawng te leh Mizoram kan tan mar pat a ngai dawn.
"I-League a player thawh hnem ber kan nih bakah I-League a a state ang zawnga goal khung hnem ber kan ni. Mizo player te goal khung chanve pawh hi state dangte hian an khung phak lo. Chapona ni lo se, he hlawhtlinna hi i chhunzawm zel ang u.
"Tuna kan thlenchin hi a ropui kan ti a, 2012-a MPL kan tan khan engtikah emaw chuan kan la champion ang ka ti a, mahse kan rin aiin kan champion hma a, hei hi Pathian vang a ni a, kan vaia thawhrah a ni a, kan theihtawp kan chhuah tlan zel a ngai, MFA in mipui chungah rinna kan nghat a, MFA chuan kan theihtawp kan chhuah zel dawn a ni." tiin a sawi bawk a ni.
Aizawl FC President Pu Robert Romawia Royte a lo dingchhuak a, "Zanin tlaiah hian Zoram chhung leh pawn, khawvel hmun hrang hranga Aizawl FC chhungkua zawng zawngte; Aizawl FC tantu leh AFC hi mipuite tana din a ni tih hriaa theihtawp chhuaha tantu zawng zawngte, in zavaiin AFC hming leh ka hmingin lawmthu ka sawi e.
"Aizawl FC hi hian nikum season atangin i-league kan khel ve tan a, season tawpah club 9 zingah 8-na kan ni a, india rama dan phuahchawp tak hmangin tla tura tih kan ni. Mahse Federation cup ah champion zo chiah lo mah ila, pahnihna kan nih avang leh kan youth team te I-league an khelh that em avangin kan rawtna te ngaipawimawhin AIFF in I-league ah min telh leh a, AIFF chungah lawmthu ka sawi a ni.
"AIFF te nena kan indawr laiin 'Chak zawkin kan lo kir leh ang' tih kan tiam a. Kan head coach zahawm tak leh a thawhpui leh Pu Techical director Hmingthanga leh player zawng zawngte, ka intiamna min tihhlawhtlin sak avangin ka lawm a ni.
"Nikuma tla tur kan nih lai khan Mizo football fans kan rilru a na em em a, mahse Pathian hnenah kan tawngtai nasa, Pathian khawngaihna kan hnenah a lo lang ta. Ni 365 chhungin I-league ah kan lut leh ang tih kha ka intiamna a ni a. Kan intiamna angin, Zero to Hero kan ni ta hi Pathian vang a ni.
"Kan sawrkar chungah lawmthu kan sawi a, I-League inpetkai ringawt hi a ni ringawt lo, infrastructure kan nei hman hlauh a, kan sawrkar hotuten stadium min pe hman a, kan lawm tak zet a ni.
"Sum leh paiah kan pachhe em em a, Mizoram sawrkar chuan min khawngaih avangin VAT min awltir, Pu Lalthahawla leh a sawrkar chungah lawmthu ka sawi tak zet zet a ni.
"Pu KS Thanga hi President hmasa ber (Indinthar leh hnuah) a ni a, Aizawl FC dinthar leh nana tha thawhtu zawng zawngte chungah lawmthu ka sawi mawlh mawlh a ni. Mipuiten a maka makin Aizawl FC min support a, Aizawl FC hian danglamna mak tak kan nei a, home-ah fans kan neih hnem chu thuhran, away-ah fans kan ngah hle, away fans ngah ber kan ni. Fans hi kan chakna hnar a ni.
"I-League kan kai tirh hian india ram hi secular state a ni si a, kross hi hman zel a rem dawn nge dawn lo kan ngaihtuah a, zawhna pawh kan dawng hnem. Mahse India ram hi sakhaw tihbik nei lo a ni a, sakhaw tinin zalenna kan nei a, chuvang chuan kross hman pawh hi a rem lohna engmah a awm lo, kan hmang zel dawn a ni tih hi state dang media-te ka chhanna a ni.
"Sum kan mamawh em em maiin company hrang hrang an rawn inzuar ve a, mahse he cross avang hian kan tan pawm a rem lova, kan retheih zia leh sum kan mamawh zia ngaihtuah chuan a vaibelchhe bi han hnar hi chu a har thin. Mahse Pathianin a ropuina tihlan nan AFC hi a lo hmang duh a, kan hnar chu hlawhchhuak chiah lo mah ila hrilselna hmangin AFC hi Pathian chuan mal a sawm leh tho a ni." tiin a sawi.
TBC Zaithanpuia chuan kalkhawm mipuite zaiin a awi a, Mizo hlapui "Ro min rel sak ang che," tih chu sain, mipuiin zah takin ding chungin TBC-a hi an lo zawm a ni. Mizoram sports association hrang hrang leh mi tha tak tak ten Champion team lawmpuina thilpek an hlan a, Mizo hnam lam Cheraw mawi taka entir niin, zai leh lamin he hun hi an hmang a ni.