Anthony Joshua chuan a khingpui Joseph Parker chu a hneh a, heavyweight title belt pathum a kawl ta a. Hetih rual hian 100% knock-out record a neih erawh a tawp ta thung.

Joshua hian a khingpuite a hneh pangngai mai ngai lo a, mi 20 a lo hmachhawn tawhte chu a knock-out vek hlawm a. Joseph Parker erawh hi chu 118-110, 118-110, 119-109 in a hneh a, chak nan judge te point-ah a innghat ve tlat a ni.

IBF leh WBA title te a kawl mek a, Cardiff, Wales a Principality Stadium-a mipui pungkhawm 78,000 zet hmaah WBO title kawltu Parker a hneh leh bawk avang hian Anthony hian title pathum a kawl ta a ni.

Joseph Parker hi an inhnek lai hian a che kual nasa hle a, hei vang hian Anthony Joshua pawhin a duh angin a hnek theih loh phah a, knock-out tum viau mahse a puitlin theih loh phah a. Heti chung hian Anthony chuan heavyweight khawvela chak loh neih loh reng a tumna chu a la tihlawhtling zel a ni.

Tunah chuan Anthony Joshua hian heavyweight inelnaah title pakhat chiah la kawl loh a nei ta a, chu chu WBC title a ni a. WBC title kawltu, American boxer Deontay Wilder nen an inhmachhawn theih hun tur thlir a ni ta a. Boxing khawvelah hian heavyweight category-ah title pali kawl thei an la awm ngai lo a, Anthony hian a thei ang em tih chu zawhna lian tak a ni ta.

WBC belt kawltu Deontay Wilder hi zuam mai mai chi a ni hauh lo mai a, vawi 40 inhnek tawhin a la chak vek a. Heng mi 40 a hneh zinga 39 te chu a knock-out nghe nghe a. Amaherawhchu, Deontay leh Anthony te hi an inhnek dawn a nih pawhin kumin chhung chuan a ni thei dawn lo a ni.

Joshua hi British boxer niin, British heavyweight boxer zingah chuan title pathum kawl thei pathumna a ni a, a hma hian Tyson Fury leh Lennox Lewis te chuan belt pathum an lo kawl tawh a ni.

He inhnekah hian Anthony Joshua chuan £13 million hlawhin, a khingpui Joseph Parker chuan £7 million a hlawh niin an sawi.