Nilai zan Champions League inkhelah Manchester City leh Monaco an inhmachhawn a, goal riat zet luhna inkhelah hian mual neitu City an dingchang ta zawk a ni. He inkhel hi Champions League knock-out stage first-leg bika goal luh tamna ber inkhel a ni nghal a ni.
City tan Aguero chuan goal hnih khungin Stones, Sterlong leh Sane-te'n goal khat theuh an khung ve bawk. Radamel Falcao a langsar a, goal hnih khungin rawlthar duhawm Mbappé chuan goal khat a khung ve bawk.
Manchester City 5-3 Monaco
(Sterling 26', Agüero 58', 71', Stones 77', Sané 82') (Falcao 32', 61', Mbappé 40')
PLAYER RATINGS:
Manchester City: Caballero 6, Sagna 5, Stones 5, Otamendi 4, Fernandinho 4, Toure 5, sterling 7, Silva 6, De Bruyne 6, Sane 9, Aguero 7. Subs: Zabaleta 6, Fernando 6, Navas 6.
Monaco: Subasic 4, Sidibe 5, Raggi 5, Glik 4, Mendy 7, Fabinho 6, Bakayoko 5, Lemar 6, Silva 8, Mbappe 8, Falcao 8. Subs: Germain 6, Moutinho 6, Dirar 6.
Etihad Stadium-a goal hmasa ber hi Sterling khung a ni a, mual veilam atanga Sane siamsak chu Sterling awlsam takin City hmahruaina goal ni turin a pet lut a ni. Monaco player-te'n Sterling hi a off-side niin an ngai a, tv replay en nawn chuan Sterling hi a off-side ngei a ni.
Claudio Bravo aia lut Caballero a chesual a, a ball petchhuah tha tawk lo avangin Monaco lamin City goal bul lawkah ball an chang a, Fabinho chuan duhthusama thain Falcao tan ball a vawrhlut a, Falcao hian nalh zetin tlu chungin a tauhlut a ni.
Falcao goal thun hnu lawkah Mbappé chuan rawlthar țha bik a nihzia a lantir a, Fabinho ball pekluh umlutin angle zim tam atangin Monaco hmahruaina goal a khung. Mbappé goal khung lawk hian City lamin penalty an beisei a, Monaco goalkeeper Subasic chuan box chhungah Aguero titlu mahse refree berin penalty a ham lo a, Aguero hi a tlu hma lutukah(dive) ngaiin yellow card a pe zawk a ni.
Second half țan hnu lawkah Falcao-a'n penalty a hlawhchhuak a, City hmelma Manchester United tana khel tawh hian City goalkeeper Caballero a paltlang thei lo.
Darkar khat an khel tling tep tihin Subasic a chesual a, Aguero goal shot chu holam takin a chhuah. City tlarhnung tan Falcao a hnawksak takzet a, minute 61-naah Colombian striker hian goal ropui a khung.
Silva chuan mual veilamah Falcao tan ball a vawrh a, Falcao hian umlutin Stones awlsam taka a bum hnuin box pawn hret atangin 'cool' zetin Caballero a chip khum a, Monaco bawkin hma an hruai leh a ni.
Minute 70 hnuah City an inlar a, Pep Guardiola naute hian goal thum zet an khung belh a. Aguero chuan De Bruyne corner pet atangin City siphurha a rul a. Aguero goal khung atana minute 6 hnu lekah Silva corner pet atangin Stones chuan City goal lina a khung chhunzawm veleh nghal bawk. City chakna nemnghehna ni turin khel tha tak Sane chuan City goal ngana minute 82-naah a khung veleh a ni.