Gionee LPS Pro Fight 2017 chu November ni 7, Thawhlehni zan khan Ramhlun Boxing Hall-ah tan a ni a, inhnek vawi 13 a awm. November ni 8, Nilaini zanah chhunzawm leh a ni ang.
Lightfly (first round)
Denis Lallawmsanga (Chawngtlai) bt David Lalzamlova Ralte (Chanmari West)
= Technical Knockout (Round 1)
Denis Lawmsanga'n a tir atangin a nawr hneh hle a, Zamlova a chiai nasa a, chhiar ngaiin vawi thum a talbuai a, referee C Vanlalchhuanga'n round khatna tawp dawnah inhnek titawpin chungnung takin Denis Lawmsanga a chak.
Lalramhmangaiha (Maubawk) bt Lalrintluanga (Lungpho)
= Technical Knockout (Round 1)
Ramhmangaiha'n kawng tinrengah inhnek a thunun nghal a, lehlam hmaiah chiang tak takin a hnek a, an inkhingtawk lo. Referee C Vanlalchhuanga'n Rintluanga chhanin round khat an inhnek zawh hmain a ti tawp.
Hmangaihkima (New Ngharchhip) bt Lalnunmawia (Edenthar)
= Split Decision (28-29, 29-28, 29-28)
A tir phatah Nunmawia'n na takin a nuai a, a hnek chhuak tam hle. Round khatna tawp atangin Hmangaihkima a insiam tha a, awmze nei takin a bei let thei. Round hnihna atangin Nunmawia tha a zuai a, fei takin Hmangaihkima'n a khel ve thung a, an inbeitawk hle. Judge pahnihin New Ngharchhip boxer an chaktir a, judge pakhatin Edenthar tlangval a chaktir ve thung.
Vanlalduhsaka (Chaltlang) bt Lalfakawma (Tanhril)
= Unanimous Decision (29-28, 30-27, 29-28)
A tir atanga a tawp thlengin an inbeitawk a, thiamna kawngah Duhsaka a chungnunga chiang tak taka a hneh fuh fo hmangin Fakawma lakah a dinhmun a siam.
Bantam (first round)
Lalremmawia (Phunchawng) bt Vanlalhmingsanga Ngente (Muthi)
= Unanimous Decision (29-28, 29-28, 29-28)
Thiamna nei tha tawk lo ve ve mah se tharum leh thahrui an nei dun hle. Langsar zawk hriat harsa khawpin an innuai tawk a, Remmawia'n round hnih lain Hmingsanga'n round khat a chang.
Rodingliana (Edenthar) bt Ramtharnghaka (North Lungpher)
= Split Decision (30-27, 30-27, 28-29)
Ramtharnghaka'n a hnek chhuak tam na a, thiamna a nei tawk lova a hnek a dik zo lo. Rodingliana'n mar tha takin a khel a, an nawr fuh a langsar a, round thum chhung inhnehtawk hle mah se judge pahnih point pekah round tin a la vek.
Lalruatsanga (Khawzawl) bt Lalthakima (Durtlang Leitan)
= Knockout (Round 2)
Round khatnaah an inpawmchilh laiin Thakima a tlu a, Ruatsanga'n a pum vel bawrah a tauh vang niin a lang a, referee K Laldawngliana'n chhiarin Thakima erawh a hrem lo. Round hnihnaah Ruatsanga a tlu leh a, Thakima'n a bekah a hneksak vang niin a tluk dan hmasa nen a inang lo va, Dawnga'n vawi 10 a chhiar thleng pawhin Ruatsanga a inpeih hman tawh lo.
Lalruatkima (Mamit Field Veng) bt Zosiamliana (Bualpui V)
= Unanimous Decision (29-28, 28-28, 29-28)
Thiamna pangngai tak lantir ve vein an inhmachhawn a, hnek chhuak tam zawk Ruatkima'n a dinhmun a siam hram. A tir atanga a tawp thlengin tlakfual nei lovin nung takin an inbei a, thahrui an nei tha dun hle.
Light (first round)
PL Thanfela (Kawnpui) bt Lalremtluanga Hmar (Chanmari West)
= Unanimous Decision (29-28, 30-27, 39-27)
Feet 6-a sang Thanfela leh amah aia inchi sariha hniam Remtluanga inhnek hi mipuiin an lawm hle a, an thiam danin an inhelnuai nasa a, ban an vai viau bawk. Ban sei zawk Thanfela a dingchang a, Remtluanga nena an inhnek hi mipuiin an hlimpui tak zet.
Isak Lalchhanhima (Zawlnuam) bt Lalhmangaihsanga (Lunglei)
= Technical Knockout (Round 2)
Chhanhima'n hruihrual chhung a thunun nghal a, boxing thiamna tha lantirin a vei leh ding mar leh khawng tha takin a hnek chhuak a, Hmangaihsanga'n a veng hneh lo. Round hnihnaah Chhanhima'n a vei lamin na takin lehlam nakah a hneksak a, Hmangaihsanga chiaiin pawn lam atangin towel an vawm lut a, an inhnukdawk.
John Lalrawngbawla (Zemabawk) bt Malsawmzuala (Tachhip)
= Unanimous Decision (30-25, 30-25, 30-25)
An inngamtawk hle a, an inhnek tam dun viau bawk. Rawngbawla'n thiamna nei tha zawk a nihna chhawrin chhiar ngai khawpin tum hnih Sawmzuala a talbuai a, mahse, bei zui ve leh zelin a tawp a thleng.
Middle (round of 32)
Lalduhsanga (North Vanlaiphai) bt Lalngaihawma Ralte (Thingthelh)
=Knockout (Round 2)
Duhsanga'n kawng tinrengin Ngaihawma a awpbet a, round hnihnaah knockout-in quarterfinal a lut. Ngaihawma'n tuar tam hle mah se round hmasa ber a khel tluan thei a, round hnihnaah Duhsanga'n a veiin a hnek fuh zawn a, Thingthelh tlangval a hawi buai. Hetih lai hian North Vanlaiphai boxer-in a vei leh dinga a hnek zui leh a, Ngaihawma'n awmzia a nei tawh lova referee Rosema Colney chuan a titawp nghal.
Lightheavy (round of 16)
Lallawmkima Sailo (Chaltlang Lily Veng) bt Lalruattluanga (Chhingchhip)
= Unanimous Decision (30-26, 30-26, 30-26)
Lawmkima'n knockout a tumna puitlin zo lo mah se Ruattluanga lakah round zawng zawng la fai vekin quarterfinal a lut. A tirah beiseiawm takin Ruattluanga a nawr a, tha taka inveng chungin Lawmkima'n an chhang let a, hnek na zawk leh tuan tha zawk a nihna hmangin round khatna laihawl atanga a tawp thlengin a thunun a ni.
(adsbygoogle = window.adsbygoogle || []).push({});