Hoffenheim an che buai a, an relegate ngei tawh dawn niin a lang, game 14 chiah a awm tawh tihin Hoffenheim chu Bundesliga mawngber dawtah an awm a, relegation zone atanga tal chhuak turin point 5 lai mamawh mek dinhmunah an ding bawk.

Football khawvel mak tih khawpin Hoffenheim-in thu thar an rawn nei ta a, an club chhanchhuak turin kum 28 leka upa Julian Nagelsmann chu Hoffenheim manager thar ni turin kum 3 daih contract an ziah pui ta a nih kha.

Julian Nagelsmann hian season tawp lam point 42 hmuh theihna ah Hoffenheim chu point 23 a rawn hlawhchhuahpui a, Bundesliga season 2016-17 khel thei turin Hoffenheim chu a him chinah a hlangkai ta a ni.

Hei mai hi thil mak ala ni lova, season kalta khan Hoffenheim kha Bundesliga game 28 a enkawl-ah tum 3 chiah a tlawm pui a, Hoffenheim club history thar siamin a vawikhatna atan Hoffenheim chuan Champions League an khel dawn ta.

Budesliga manger of the year a an thlan a nih hnuah kum 30 mi Julian Nagelsmann hi 'Germany Manager of the Year 2017’ atan thlan a ni leh a, he lawmman hlu tak hi sport magazine Kicker buatsaih niin, Germany-a sports journalist ten an thlang a ni.

Nagelsmann hi TSV 1860 Munich youth team tan a khel thin a, a team-mate thinte chu Bundesliga player hlun an ni chho mek a ni. FC Augsburg a zawm hnu lawkah vanduaithlak takin a khup a ti hliam a, kum 20 mi lek ni chungin football khelh a chawlhsan a ngaih phah.

Nagelsmann chuan, "A tirah chuan football chungchang hrim hrim hi engmah ka ngaihtuah duh lo bur thin a, kum naupangte ni chung a football khelh ka chawlhsan tur kha ka rilru a na em em a ni," tiin naupang te ni chunga a chawl ta a rilru nat zia a sawichhuak.

Nagelsmann hian Borussia Dortmund manager hlui Thomas Tuchel chu coach hna a thawh tan nana mi pawimawh tak a nih thu a sawi a, kum 2007/08 season a Tuchel-a'n Augsberg reserve team a enkawl laiin Nagelsmann hi an khelhpui tur team te zir chiang turin a ruai thin a, heta tang hian coaching hna ah a luh chhoh thu a sawi.

Kum 25 leka upa a nih laiin Bundesliga a asst. coach naupang ber nihna record thar siamin Hoffenheim U-19 team chu National title a lakpui nghal thei a, Hoffenheim senior team manager Huub Stevens chu a hriselna a thatloh avanga a hna atanga a ban hnuah Bundesliga manager naupang ber nihna 11 February 2016 khan a rawn hauh ta a ni.

Heti tak mai a Hoffeinhem club tlu chhe mai tur a rawn tun din theih chhan ber nia an ngaih chu player te nen an inkarah inkungkaihna tha tak leh inpawhna tha tak a siam theih vang niin an ngai a, Germany coach Joachin Low pawhin a manager dahsan tak zing ami a nih thu sawiin players te nen an inkarah inkungkaihna tha tak a siam thei chu fakawm a tih thu a sawi.

Tunlaiah manager tinin khawl changkang tak tak hmangin an tactic tur vel te an inbuatsaih thin a, kum 29-a upa Nagelsmann erawh hi chu a note bute leh pen nen room-ah a inkalhkhum a, a game neih leh tur atan a inbuatsaih thin niin German newspaper ho chuan an tarlang.

Nagelsmann hian a hran in office neih pawh a duh lova, a assistant te ho nen room khatah an awm ho mai thin a, a coaching staff te nen pawh an in pawh phah hle.

Squad rotate dan thiam tak niin a players neih te ah lungawilo hmel hmuh tur an awm ngai lova, a hnuaiah hian phur takin practice session pawh an nei ziah thin a, team chhungah boruak tha tak siamin chu chu an result ah a rawn langchhuak ta a ni.