Joachim Low chuan Confederations Cup-ah regular players dahthain player naupang zawkte a chhawr, draw vawi khat neiin vawi thum an chak ta.

Nizan khan 4-1 laia Mexico hnehin final an lut, final-ah Chile an hmachhawn ang. Mexico an hneh tum pawh hian Germany boss Joachim Low chuan regular players Manuel Neuer, Jerome Boateng, Mesut Ozil, Toni Kroos leh Thomas Muller-te a chawlh tir.

Attacking football fing takin an khel thiam bawk nen, Russia-a Confederations Cup-ah hian goal 11 lai an khung tling ta der mai. An that zia khawvelin an hmu, B team pawhin ropui takin an khel thei tih a lang chiang.

Germany striker ropui leh team coordinator Oliver Bierhoff chuan player naupang zawkte khelh dan chuan senior-teah pressure nasa tak a pe mek niin a ngai.

"Hetiang dinhmun kan thleng hi kan lawm tak zet a ni. Results pawimawh tak kan hlawhchhuak. Chung zawng aia kan lawmna chu player-te khelh dan a ni a, tuna kan player chhawrte hi tute nge an nih in hria e.

"Kar hnih thum liamta chhung khan player naupangte an khel tha hle, team-a tel pawh hi an phu a ni.

"First choice player-teah pressure a siam chiang mai, a chhan chu an khel tha em a. Leon Goretzka khelh dan te kha in lo hmu anga, second half-ah pawh Josh Kimmich kha captain atan kan hmang a nih khka.

"Results duhawm tak an hlawhchhuak mek, heng player naupangte hian cup hi an chawi ngei ka beiseipui a ni," tiin a sawi.