Kum 1990 hnu lamah technology nasa takin a thang, mimalin computer an neih chinah phei chuan hmasawnna hi a zuanin a zuang a tih theih awm e. Kan generation hi kan vannei em em, technology vanga khawvel lo danglam chho nasa lutuk hi kan tawng chho ve a, chuvang chuan video game chungchang pawh hi sawi tur kan nei theuh ngei ang.

Media 8 bit atangin vawiinni thlengin game ka la khel mek. A bik takin mipa tan chuan a lo nuam fal em em bawk si a, kan thlah hleithei ta lo a nih hi. Game hian mihringah nghawng thalo tak tak a neih sawi tur a tam ang, chutiang bawkin min tihhlim thin zia pawh sawi tur a tam tak zet.

PC game Zuma kan han khel tak tak thin kha chu, kan han mu zangthal a, thosilenah hian a lo vir muai muai a, a chang leh kan mangphan thul. Biak Inah te hian kan hmaah kawr sen ha pahnih an thu dun, kan tlarah kawr sen ha pakhat a thu bawk, kan tlara kawr sen ha chu tlar hmaa sawn phei deuh chhak hi thil chakawm tak a ni thin. Gold Miners khelh uar lai pawhin khai nel nel chak tak hi an awm nawk thin a nia. Chutiang khawp chuan kan real life pawh a nghawng thin.

America rama thalai tharum thawhna hluar em em chhan chu video game-a tharum thawhna lam khelh a hluar vang niin mi tam tak chuan an ngai, Grand Theft Auto (GTA) phei chuan sawisel pawh a hlawh nasa tak zet a nih kha, mihring pawisawilo han kah chiam chiam te, car-a han chil deuh pap papte kha a nuam bik em alawm, mission aia khatianga khelh thlang zawk pawh kan tam ve ang. Need For Speed kan khelh tak tak lai kha chuan bike-in emaw motor-in emaw han tlan ila, motor dang han su pawp pawh ni mah ila chhe thei lo leh na thei lo anga inngaih thut chang pawh a awm thin.

FIFA kan han khel tak tak thin phei chu winner challange kan ti a, zan tairek tlengin kan kuk ruih ruih, tukverh parda kan han hawng a, kawl a lo eng pup tawh thin. Chhunah mutchhuak tawkin kan nileng, hriselna pawh hian a tuar thin tak zet a ni. Chutiang bawkin Dota pawh, zan a rei tulh tulh a, net a chak tulh tulh, rilru a fim tulh tulh, zanlai dar 1 hi a la hma lutuk, zing dar 4 erawh a tlai leh tawh lutuk bawk si a tuka hna neih bawk si chuan.

Tunlaiah mobile phone tha tak tak a rawn chhuak ta, an lo thut khawm lat lat hi chuan ka lo join ve kan han ti nghal a, Mini Militia pawh kha kan khel rei fu a nih kha. Naupang, thalai leh nu leh pa thlengin kan bang tawh lo, mobile game kan khel vek tawh a, a tua pawh hi gamer vek kan lo ni ta. Chuvang chuan tawnhriat atangin game khelh dan tha tlema zawng han tarlang ila.

Mit hi a pawimawh em em, mit a kham hi chuan eng tihmah hi a nuam lo. Chuvang chuan mit hi dim em em tur a ni a, mobile game khel nasat lutuk hi a tha lova, a theih hram chuan console emaw PC-ah emaw khelh thin hi a tha. Mobile phone chu a te si, mitin a focus kha a zuk te tawh bawk si a, chutih laiin brightness tihsan loh chuan khelh a nuam bawk si lo. Chu chuan mit a heh em em, chuvang chuan mobile game i khelh chuan chintawk hria la, zan mut hnu; light down hnuah thim thamah rei tak khel suh ang che.

PC Gamer ho, a bik takin Multiplayer online battle arena (MOBA) lam khel nasa te hian an thutna an thawhsan mawh khawp mai. Game khelh tak tak i tum chuan screen hlai tha deuh lei hram tum ang che, mit chhiat ai chuan tlema sum sen deuh pawh kha a pawi miah lo a nia. Tin, thenkhat chuan chaw ei thulh thak thakin an khel bawk a, food supplement (drink) lam inchhawp thin a tha, taksa hriselnain a tawrh theih avangin. Tin, tun dinhmunah Mizoram chhungah chuan eizawnna tlak a la nih loh avangin enjoyment atan hman a tha rih.

Console emaw PC game emaw kan khelh reng rengin kan thutna hi duhtui tur a ni a. Chair sang deuh hman loh hram a tha, a chhan chu kan malpui hnuai lama thisen zam hi kan lo thutbet thin a, chu chuan ke lama thisen kal tha tur a tibuai thin. Tin, kan nerve pawhin nasa takin a tawrh theih thin avangin thutna dup leh nghenchhan tha tak ngaihtuah hram hram thin a tul a ni. Sawi leh sawi hnu, mit hi a pawimawh em avangin eye drop lam te hman a tha a. Tin, minute 10 danah emaw screen ni lo khaw dang hawi zauh zauh reng hi a tha a ni.

Kuhva leh meizial ti tan game khelh lai hi chuan hla deuh hleka dah hram a tha. Hnathawh lai leh game khelh laia kuhva hmawm mawlh mawlh emaw zial tan sek emaw hi a awl khawp mai. Chuvang chuan ban phak lohva dah khan nasa takin awmzia a nei thin. Zan kan lo meng rei deuh a nih pawhin hman hun hunah exercise lak thin a tha bawk.

Kan thatlai hi chuan hlim taka awm tur a ni a, gaming lam kan lo tui a nih pawhin khelh bawrh bawrh tur, mahse a chintawk hre lo erawh an mawl. India ram chhungah eizawnna tham a nih hunah chuan theihtawpa khelh pawh a pawi miah lo, mahse tun dinhmunah hi chuan atchilh bur erawh a la hun lo hle. Kan career ti chhe rak khawpa buaipui hi a pawi a, chhungkaw din tur, nupui fanau chawm tur kan nih phei chuan eizawnna kha a pawimawh hmasa rih ber tih kha hre reng ang che. Tin, a tawp ber atan, kan game khelh nasat lutuk avanga nu leh pa ten min hau a nih chuan kan thinrim tur a ni lo, kan dik lo a ni tih kan pawm thiam tur a ni.