Kuminah Formula One season an tanna la rei lo mahse FIA chuan 2019 season atan ruahmanna an siam chho nual tawh a. Ruahmanna hrang hrang zingah fuel thun theih zat tihpun an tum a ni.
F1 dan siamtu, Formula One Strategy Group leh Formula One Commission te chu Paris khawpuiah an inhmuhkhawm a, Formula One hma lam hun tur an thlirho a. 2021 season atang chuan nasa taka tihdanglam a nih tur thu an lo sawi tawh chungchang an relho bakah season thar atan thil pathum thlak danglam an remti bawk.
Thutlukna an siam hmasak ber leh langsar ber chu F1 car a fuel thun theih zat tihpun a ni a. FIA chuan a hmaa kg 105 thun theih chu kg 110 a thun theih tura tihdanglam an remti a, heti a nih chuan fuel ren lutuk vanga duh anga tlan chak ngam loh a tlem phah an ring a ni.
Kumina an intlansiak tawhna hmun pahnih kha fuel hman nasat ngai ve ve an ni a, kawng ngil thui deuh hlek tawpah chuan inrenchem taka chhunzawm a ngai fo a, driver te chu an duh angin an tal theih loh phah fo a. A hma aia kg 5 zeta tam an thun thei a nih chuan uar zawka tlan pawh a rem phah dawn niin FIA chuan an sawi.
Hetiang thutlukna hi FIA chuan siam mahse an la tlan zelna tur track tam zawkah fuel hman nasat lutuk a ngai tawh dawn lo a. Hei mai bakah hian team ho chuan fuel pai hnem lutuk loh te an lo duh thin a, an thun tlem deuh chuan car chu a tlan chak theih phah ve bawk si a. Fuel thun theih zat tipung mahse a tam zawk chuan tam deuh thun loin inren deuhin an tlan leh tho a rinawm.
FIA chuan 2019 atangin car rihna leh driver rihna chu a hranpa veka lak a nih tawh tur thu an sawi a. Kimchang takin thil la sawi lo mahse a hma anga car leh driver rihna belhkhawm inrualkhai tur an tih ang kha a ni tawh dawn lo a. Driver thau leh sang deuh te tan intihcher vak vak a ngai tawh dawn lo a. Kumin atanga an tih tan, driver thutna vengtu ‘Halo’ vangin driver te chu an intihcher a ngai sa hrim hrim a ni.
2019 atangin driver zawng zawng chuan biometric glove an bun vek tawh dawn bawk a, hei hi kumin kum tir khan an lo en chhin tawh a. An chetsual pawhin medical staff te chuan driver te chinchang an hre nghal zung zung thei dawn a. An kutkawr bunah hian 3mm sensor an dah ang a, hei hian an marphu leh an thisena oxygen awm zat a lo en reng dawn a. A hnu zelah phei chuan taksa temperature leh thawk dan zawng zawng pawh en theiha siam an tum.