Football i tui tak tak a nih chuan, hun i nei emaw nei lo emaw pawh nise match hmuhnawm hi chu i hmaih phal ngai lovang. Champions League hi a ropui thlawt, season tin hi a hmuhnawm em em ziah mai a nih hi. Hei zanin atangin Round of 16 khelh tan a ni leh dawn. Football fans tak tak hun hman thin dan tlemte han tarlang teh ang.
Champions League Group Stage hi chu zanlai dar 12:30 atangin match tan a ni thin a, zing dar 2:20 velah kan mu hman thin, zing dar 8 vela kan thawh chuan darkar 5 vel kan mu hman a, a ziaawm thin khawp mai. Chutih laiin Daylight Saving Time avangin Knock Out Stage atang hi chuan zan/zing dar 1:15 emaw dar 1:30 emawah tan a ni ta thin a. Zing dar 3:30 velah kan mu hman tlangpui. 2nd leg-ah pawh an la inhnehtawk phei chuan extra time leh penalty thleng chuan zing dar 4 velah kan mu hman tawk thin.
A tukah hna/class-in min hmuak run thin bawk si. Zirlai tan lah Quarter Final vel hi exam hun a lo ni tawh thin bawk nen, rilru hi a va hah duh thin tak em. Kan mut theih hunchhung hi kan han chhut kauh kauh a, darkar 5 pawh kan mu thing tawh dawn lo tih kan han hria, alarm kan set a, mit bui chukin tukthuan eikhamah kan han chhuak thin hi a ni a. Chutih laiin inla football ngaina si, (Dam loh vang erawh thudang nise) zanrei inkhel en peih lo leh zing lama match chungchang min han zawt thin ho hi chu hrilh loh tawp an chakawm thin.
Kan damchhung ngei pawh hian sik leh sak nasa takin a inthlak danglam tawh, nikum te khan quarter final atangin ruahtui a tla tan tawh a nih kha. Mak ve em em chu chhunah khua a tha vung vung a, zan dar 12 vel atangin khua a rawn dur, khawpui a ri dur dur a, inkhel kan en thei lo mai anga tiin van lam kan en kan en. Inkhel a chhuah chhoh lai takin nasa takin a rawn thawk ta mai thin a. Tekin TV a den kan hlau, kan han off, kan muhil thei bawk si lo. A va han hrehawm thin tak em! Tunlaiah chuan internet te a awm tawh zawk a, results ngaichangin emaw livescore enin emaw rizai hnuaiah kan mu meng ker thin.
Tunlaiah internet a tha chho tawh a, results en zung zung tur a awm tawh. Tin, match hightlight entur pawh a lo awm leh nawlh thin, a ziaawm tawh hle. Tun hma internet kan la hman ve theih hma kha chuan tek a tlak avanga inkhel en theih loh chang leh khawdanga zin changa inkhel en theih loh chang hi chuan a va han hrehawm tak. Inkhel results kan hre si lo, zingah Sports Centre leh CNN Sports/BBC Sports chhuah hunah TV kan han ON chat a. CNN lamah Pedro Pinto khan a rawn puang ngei bawk a, a goal lai tal kan hmuh loh hi chuan awm hi a nuam ngai lo a ni ber mai.
Istanbul-a Liverpool leh AC Milan-in Champions League final an khelh tum khan Saitualah inkhela kan zin lai a ni a. A tukah match kan neih avangin mut hma a ngai, chutih laiin final kan enchak si. En chak zual ho kha kan tho leh a, first half-ah si thum fai ngawtin AC Milan-in hma an hruai. Premier League kan en than avangin Liverpool kan lo tan deuh vek hlawm a, "An chak tawh dawn lo tho tho; mu mai ang," tiin kan mu ta. Kan mut atanga reiloteah khan thenawmte an au dar dar, "E he.. Liverpool-in an ti goal a nih chu," kan ti. Chutah a hnu lawkah an au leh ta dar dar, kan tho leh ta nge nge a, Liverpool goal thumna kan hmu hman. A va han hmuhnawm tak em kha match kha chu.
Hmeichhe thenkhat football ngaina tak tak an awm ve thin, chungho chu mipate hian kan ngaina nghal mai thin. Chutih laiin mipaten football ngaina hmeichhia an kawm thin avanga hmeichhe thenkhat football ngaina tak tak lo, mahse luck duh vanga inla football ngaina an awm thin. Chung erawh mipa hian an ngaina tak tak thei lo. Mi kan hmuh vawi khatna pawh nise, kan club tan em em jersey an lo hak chuan kan pawh nghal chawt thei bawk a, khawi hmunah pawh kalkhawm ila football community hi a lo awm zel a, kan thutkhawm tawh hi chuan kan sawi ho lat lat a, thil nuam tak hi zawng a ni chiang e.
Tin, thil pakhat mak em em chu, Sunday zanah kan tan team an han chak a, hightlight zawng zawng nen, pundit thusawi zawng zawng nen kan ena kan ngaihthlak hnuah pawh thawhlehni zinga Vanglaini chhiar kan nghakhlel em em thin bawk. Transfer hun a ni a, kan club tan ten player an han lathar a. Paper-ah hian formation tur te kan han ziak chawp a, hlim deuh hian kan han mu siai siai thin bawk a, a nuam ve thin hle a ni.
A tawp nan, football fans tan hi chuan depression an tih ang chi te pawh hi neih a har a niang. Mid-week match kan nghakhlel em em, hei tunah pawh V-Day kan nghahhlelh em emna chhan chu Champions League knock out stage tan a nih dawn vang a ni leh bawk a. Chutah weekend-ah league game nghahhlelhawm tak tak a awm zel bawk nen. Tun season-ah chetha lo mah ila transfer market-ah player thar kan lei anga, season tharah chuan kan champion ve tawh ang tiin beiseina nen hun hi kan thlir bawk a, nun boring tak hi kan nei ngai lo a ni.