Hei tluka football fan rinawm hi an awm thei angem?
Bishop Auckland FC fan ruhkawl, Colin Rowell chuan a thih hnuah a football club tan em em tan hian £300,000 a hnutchhiah rup mai le.
Colin hi tun kum January thla khan kum 79 mi niin a boral a; a ro hnutchhiah tam tham zet mai chu he a football club hmangaih em em tan hian a dah a ni.
Hetiang taka a football club tan tana mi inpe zo an lo awm hi club thuneitute pawhin lawmawm an tiin mak an ti hle a, Colin-a ro hnutchhiah chu County Durham club hmalam hun atana tangkai thei ang bera an hman tur thu an sawi.
Colin Rowel hi Cockton Hill-ah mahni a khawsa thin niin laina hnai tumah a neilo a. Bishop Auckland FC tan hian kum 70 chuang zet fan rinawm tak alo ni tawh thin a ni.
He Northern League Division One club hian Colin-a chunga lawmthu sawi nan leh an zahna lantir nan an khelmualah Colin-a vap (ashes) thehdarh ngei an tum a. Hemi bakah hian an khelmual, Heritage Park ground-a hmun tha lai ber chu Colin-a hming chawia phuah anih tur thu an sawi bawk.
Club chairman Richard Tremewan chuan he induhsakna danglam tak mai hi club tana thil lawmawm tun hma a la awm ngailo leh football khawvelah pawh chhinchhiah tlak tak anih thu sawiin, "Tun hma pawhin club tana thahnemngaia sum rawn pe te pawh an awm thin a, mahse hetiang taka induhsakna hi kan la tawng ngailo," tiin a sawi.
"Colin hian nupui fanau chawm tur a neilo a; hetianga a football club tan em em, kum tamtak chhung hlimna lo pe tawh thin hnena a ro a hnutchhiah hi a awm hliah hliah a ni," tiin Darren Brown, Bishop Auckland a awm ve chuan a sawi bawk.
"A thih hnu hian Bishop Auckland FC leh an khelmual thar Heritage Park chungchang inziahna chanchinbu atanga a chehthlak tam tham tak chu a drawer khar tlatin kan hmu a. He pawisa a hnutchhiah pawh hi an khelmual tih changtlun zawk nana a dah anih hmel. A tawp thlengin he club hi a zui a ni," tiin club tana Colin-a inpekna ropui zia a sawi bawk.
Colin-a ro hnutchhiah chungchanga a executor Karen Eyre pawhin he putar football hmangaih em em tu chungchang hi sawiin," A thih hma khan a ruang an halna vap chu club khelmuala penalty spot lai taka thehdarh chu a duhthusam anih thu min hrilh a. Tuna thil thleng leh club in an thil tumte hria in rawn hmu ve thei se chuan a hlim hle ang," tiin a sawi.