England captain hlui David Beckham chuan kumin World Cup final-ah chuan England leh Argentina an intum a rin thu a sawi.

An game hmasaah England chuan 2-1 in Tunisia an hneh a, mi tam takin thleng sang tura an beisei loh England chu Beckham hian final lut tura a rin thu a sawi a. Final-ah hian South American team Argentina an hmachhawn a rin thu a sawi tel bawk.

World Cup-ah hian England hi an thleng sang thei lo hle a, 2006 khan quarter final an lut a, hemi tum hian Beckham hi captain a ni nghe nghe a. 1966 World Cup-ah khan Germany chu Wembley-ah an hneh a, hei hi World Cup final an luh chhun leh an champion chhun a la ni.

David Beckham chuan, “Argentina chuan England hi kumin final-ah chuan an hmachhawn ka ring,” a ti a. “Duh thlan theih ni ta se England hi champion tur chuan ka duh ber a, mi tam tak chuan ka ngaihdan min pawmpui dawn lo tih chu ka hria a, mahni ram tan leh duhsak chu a na ve em a ni,” a ti bawk.

Manchester United leh Real Madrid midfielder hlui Beckham hian World Cup vawi thum a khel hman a, Gareth Southgate-a pawlte kawng chu a khirh chho viau tawh dawn niin a sawi.

“Group game hmasa bera kan chak kha ka lawm khawp mai a. England player te hi la naupang tak tak an ni hlawm a, tawn hriat an la ngah lo hle a, team tha tak tak an tam avangin kumin World Cup kalkawng an zawh zel tur pawh a khirh chho viau tawh dawn a ni,” tiin Beckham chuan a sawi.