Khawvelah MMA a lar zual zel a, kum reilote chhung chuan boxing khum thei tura rinna a sang ta hle. Hetia MMA lar zel tak nachhan hi fighter tha ber berte an innuai thin vang te pawh a ni thei ang. UFC 223 lo awm turah Interim Champion Tony Ferguson leh Khabib Nurmagomedov te chuan UFC lightweight title an inchuh dawn, khawvela fighter rothap ber pahnih innuai tur hi a nghahhlehawm tawh hle. UFC fight awm tawh zawng zawnga hmuhnawm ber ni tura ring an awm nual bawk. UFC President Dana White chuan fighter pahnihte zinga a chak zawk hian Conor McGregor an hmachhawn dawn niin a sawi bawk a ni.

Undefeated Fighter(25-0), Khabib Nurmagomedov

UFC Fighter piang tawh zingah chuan 'The Eagle' Khabib Nurmagomedov aia ground game nei tha hi an awm kher lovang a tih theih awm e. MMA a khelh hma atang tawhin World Sambo Champion te pawh a lo ni tawh thin a, judo black belt a ni bawk. MMA record-ah hnehtu a la tawng lova, khawvel huapa fighter rothap tak tak Rafael Dos Anjos, Michael Johnson leh Edson Barboza te a lo hneh tawh. A fight apianga a wrestling turu zia chu kan hre theuh anga, a fight hnuhnung bera Edson Barboza a sawisak dan en chuan Lightweight Champion ngei tura rin a ni. Lightweight division huanga contender tha ber berte pawhin an tum chaklo hlawm hle. MMA Analysts tam tak phei chuan champion si lovah chuan khawvela fighter tha berah an ngai hial a ni.

Undefeated Fighter Khabib Nurmagomedov hi ka knockout dawn- Tony Ferguson

Khawvel lightweight fighter tha kan sawi apiangin 'Tony Ferguson' kan sawilo thei lo. Khawvel MMA fighter tha awmkhawmna hmun UFC-ah pawh a zawnin vawi 10 a chak a, chung zingah chuan fighter tha tak tak Lando Vannata, Rafael Dos Anjos, Edson Barboza leh Kevin lee te lakah a ni nghe nghe. A fight hnuhnung bera Kevin Lee laka submission hmanga hnehna a chang mawlh te kha a va ropui tak em! Undefeated Fighter 'Khabib' hneh thei tura rinkai ber a ni bawk. 10th planet Jiu Jitsu hmuchhuaktu Eddie Bravo (Ferguson-a coach) chuan knockout a nih loh pawhin submission hmangin a fighter hian hnehna a chang ngei dawn niin a sawi bawk. Interim Champion Tony Ferguson a phur tawh hle a, a ban sei zawkna te, wrestling lama tawnhriat a neih tawhna te hi Khabib Nurmagomedov-a undefeated streak titawp thei tura a thiamna niin a sawi a, a inringtawk bawk a, knockout ngeiin uar takin hnehna a chang dawn niin a sawi nasa hle.

Khabib leh Ferguson hi awlsam deuhin ka knockout ang - Conor McGregor

UFC lightweight champion an hlihsak tak Conor McGregor chuan a hmunah fight hi a en dawn nia hriat a ni. McGregor hian a MMA Fight hnuhnung berah Eddie Alvarez chu 2nd round chhung lekin a knockout. Hemi hnu hian boxing match-ah Floyd Mayweather a hmachhawn a, T.K.O in round 10-ah a chak lo thung. Infiamna huanga a khelh ngai miah lohnaah pawh khawvela boxer tha ber pawla an sawi 'Mayweather' laka round 10 thleng a ding thei hi an fak zui hle. UFC a khelh loh chhungin Tony Ferguson leh Khabib Nurmagomedov-te'n UFC ah boruak an siam hle a, Conor-a lah hian awlsam taka knockout theih an nih zia thu a sawi thin a, twitter lamah pawh an inhnial zak zak thin a ni.

Khawvel mipuiin an thlir chak tawh

April thlaah UFC 223-hi neih a ni dawn a, khawvel mipuiin an nghakhlel tawh hle. Tony Ferguson hi UFC Fight a neih apiangin 'boring night' a nei ngai hauh lo, striking leh wrestling combination a nei tha hle a, undefeated Fighter 'Khabib' Nurmagomedov' hneh thei turin thiamna a nei tha tawk hle a ni. Chutih laiin hnehtu la tawng lo, wrestler turu lutuk Khabib-a ground game kan hmu leh dawn a, fight hmuhnawm tak a ni dawn chiang. Undefeated Fighter Khabib Nurmagomedov hian a wrestling hmang tangkaiin a sawisa leh thei ang em? Undefeated record break-in Ferguson hian striking leh wrestling combination hmangin knockout emaw submission-in emaw hnehna a chang zawk dawn em? He fight lo awm tur hi i thlir lo phal dawn em ni.