Tun season a tana Europa League game hmasa ber khelh a ni a, Premier League club pahnih Chelsea leh Arsenal-te chuan an tumpuite an hneh ve ve.

Chelsea hian Greek club PAOK luhkhungin si khat faiin mual neitu an hneh a, Arsenal hian Ukranian club Vorskla lo mikhualin 4-2 in an hneh ve bawk.

Chelsea hi Willian-a goal khat hmangin hnehna an chang. Arsenal tan Pierre-Emerick Aubameyang chuan goal hnih khungin, Danny Welbeck leh Mesut Ozil-ten goal khat ve ve an khung bawk a, Vorskla tan hian Volodymyr Chesnakov leh Vyacheslav Sharper-ten goal khat ve ve an khung bawk a ni.

Chelsea hi an tumpui PAOK lakah an chungnung zawka, inkhel pawh thunun tluan, mahse goal khat bak an khung thei lo. Inkhel tan tirha Willian-a goal thun bak goal lut a awm lova, inkhel hmuhnawm pawh a ni hran lo a ni. London club lamin an player pahnih Eden Hazard leh David Luiz an hruai tel lova an hahchawlhtir a, hliam avanga chawl reng Cesc Fabrega erawh nizan inkhelah a inlan leh thei tawh a ni.

Chelsea striker Alvaro Morata a vanduai a, goal shot ngah hle mahse goal a khung thei lo. Chelsea lam hian chance tha an hlah nasa hle a, PAOK lam hian si tam zawk an phur lova an vannei hle a ni.

Arsenal lam an insiksawi nasa hle a, an game hnuhnung bera inkhel bul tan atangin player pathum chiahin Ukranian club lakah inkhel bul an tan. Goalkeeper thar Bernd Leno chu a vawkhat nan Arsenal tan a inlan. Player thar Stephan Lichtsteiner pawhin inkhel bul a tan a ni.

Arsenal khel a hmuhnawm a, goal pawh an khung thei. Mahse Vorskla lakah goal hnih an chhuah erawhin Arsenal defence khawng tawk loh zia a ti lang. Tun nipuia Arsenal in an lakluh thar dang Lucas Torreira chu khel tha mahse a inhliam avangin lakchhuah a ngai thung a, Arsenal lam tan thu lawmawm a ni lo.

Aubameyang a khel tha a, vanduai lo se chu hattrick a siam ngei pawhin a rinawm. Goal hnih a thun bakah post a pet per bawk a ni. Arsenal hian 4-0 a hma an hruai hnuah mikhual team lakah goal hnih an chhuah zui a, an inthlahdah deuh vang pawh a tih theih awm e.