Tun hnaiah Wayne Rooney-a'n Manchester United tan inkhel bul a tan thei ta meuh lo a, England captain hi ram tan koh loh zinga langsar ber nimahse Three Lions enkawl mektu Gareth Southgate chuan Rooney tan hmun a la awm thu a sawi.

England ram tana goal khung hnem ber Rooney(53) chungchang sawiin Southagte chuan, "Ka team khelh tir duhdanah Wayne hi ka ngaihtuah tel zinga mi a ni. Engvangin nge amah thlahna game(testimonial match) khelh hi an sawi ka hre lo, a chhan chu England tan hian khelhna hun tha tak a la nei a ni. Kan zinga a tel lohna chhan tur a awm lo," tiin United striker chu ram tana a khelh leh ngei tur thu a sawi.

Rooney hi tun hnaiah a inhliam a, United tan pawh a inlan lo. Southagte chuan Rooney a thlan loh chhan chu a hliam enkawl tur a neih vang a nih thu a sawi. Kum 31-a upa Rooney-a'n tunhma a pha tawh lo tih a chiang a, nimahsela Englnand tana khel zingah ani aia tawnhriat nei tha an awm lo. Rooney hi ram tana goal khung hnem ber a ni mai lo a, Goalkeeper Peter Shilton(125) tih loha Three Lions tana inlan hnem ber a ni bawk.

Southgate hian tun hnai khan England tana khel tura thlante leh ram tana khel tura beiseina la neite meeting a neihpui a, Rooney hi a tel loh avangin titi a ti tam hle. Southgate chuan, "Player 9 an kal lo a, Harry Kane leh Danny Rose-te ang thoin Wayne pawh hi a hliam enkawlin a buai deuh a ni mai. Harsatna a awm lo, pawimawh ber chu ram tan an khel leh thei an hriat hi a ni," tiin England captain nilai Rooney chu ram tana khel tura an la that tawk thu a sawi.