English player tha tak tak an awm nual, transfer bazarah pawh to tak taka lei an awm, hetih lai hian thenkhat erawh media tena an vawrh lar avanga to ta pawh an awm nawk bawk. English players manto 10 thlangchhuak ila.
10. David Beckham
Manchester United to Real Madrid - £25m
England ram pawna club lianin to taka an lei awmchhun chu David Beckham hi a la ni deuh mai. Sir Alex Ferguson-a'n Manchester United atangin a hnawtchhuak a ni deuh ber mai a, hetih lai hian Real Madrid-ah Ronaldo, Zidane leh Figo te nen an khel ho ta zawk a, La Liga title pawh a la nghe nghe a ni.
9. Adam Lallana
Southampton to Liverpool - £25m
Southamton academy chhuak hi an tha thin hle a, Liverpool hian a bik takin an ngaina zual niin a lang bawk. Brendan Rodgers khan £25m in Anfield-ah a seng lut a, Jurgen Klopp-a hnuaiah pawh hmun lailum a chang chho zel bawk a ni.
8. James Milner
Aston Villa to Manchester City - £26m
Sum tam taka lei zawng zawng hi a hlawhtling vek kher lo tih a chiang, City pawhin Villa atangin £26m in Milner an lalut, mahse Manuel Pellegrini hnuaiah khelhna hmun a chang tam thei lo, a free-in an chhuahtir ta tawp a nih kha. Liverpool a pan hnuah erawh tha takin a rawn khel leh lawi si a ni.
7. Wayne Rooney
Everton to Manchester United - £27m
Kum 16 mi a nih lai atangin a rawn lar hat mai, Sir Alex Ferguson chuan a hnu lawkah Old Trafford-ah a senglut ta a. Kum 13 ngawt Manchester United-a a cham chhungin hlawhtlinna tam tak a nei, United tana goal khung hnem ber a ni nghe nghe bawk a ni.
6. Luke Shaw
Southampton to Manchester United - £30m
British football history-a teenager man to ber a rawn ni, mahse Old Trafford-ah a che hleithei lo. Inhliam avangin rei tak tak a chawl thin a, Mourinho pawhin a chungah rinna a nghat ngam lo niin a lang, a dam tha a nih chuan defender tha ber pakhat a ni a, mahse vanduainain a kiansan hleithei lo a ni.
5. Rio Ferdinand
Leeds United to Manchester United - £30m
Leeds United chuan ui hle mahse Manchester United-in sum an rawn thehchhuah chu a tam tham em avangin an chhuah ta nge nge a, kum 12 chhung teh meuh mai khawvela defender man to ber a ni nghe nghe, United-in an tangkaipui zia chu sawi nawn a ngai awm love.
4. Andy Carroll
Newcastle United to Liverpool - £35m
January 2011 khan Liverpool manager Kenny Dalglish chuan £35m laiin Newcastle atangin Anfield-ah a senglut, beisei sang tak nen an thlir laiin a vanduai ta, rei tak a inhliam a, transfer man to zinga fuh lo ber pakhat a nih phah ta a ni.
3. John Stones
Everton to Manchester City - £47.5m
City-in Kyle Walker an lei hma khan City-in defender an lei zinga man to ber a ni. Chelsea lamin duh hle mahse Everton khan an hnar chiang hle a, City lamah an kaltir a nih kha.
Pep Guardiola chuan defender naupang Stones hmangin tlar hnung remphui a tum mek a, a man a to a, beisei a sang, beisei a phak chiah lo, mahse Guardiola hnuaiah defender ropui tak a ni thei ngei dawn niin a lang.
2. Raheem Sterling
Liverpool to Manchester City - £49m
Sterling-a'n Manchester City a pan tuma Liverpool fans thinur zia mawlh mai kha. Liverpool-ah ropui takin a khel a, City-ah erawh Liverpool-a a game a phak lo nasa hle, Guardiola-a hnuaiah erawh Manchester City fans chuan Messi an ti mek a nih hi.
1. Kyle Walker
Tottenham to Manchester City - £53m
England right-back Walker hi tun nipui bazarah khan Manchester City chuan Spurs atangin an lalut, England player to ber a ni ta a ni.