Serbian world no 1 Novak Djokovic chu Paris Master khelh turah a inlan thei dawn a, World no 1 ni chunga kum khar ngei tum Andy Murray pawh a inlan bawk ang.

World no 1 nilai Novak Djokovic hian kum 4 kalta chhung kha chu World no 1 ni chungin kum a khar thei a, tun season-ah erawh a che hleithei lo. Nole hian a dinhmun humhim tur chuan Paris Master-ah hian final a luh ngei ngei a ngai dawn a ni.

Nole hi semi-final hmaa a tla a nih a, Murray a champion a nih chuan Murray hi world no 1 thar a ni thei ang. A dinhmunah Nole a chiang a, theihtawp a chhuah tur thu a sawi.

"Hetiang dinhmunah hian tun hmain ka lo ding tawh a, ka tih tur ka hria. A harsa lo zawnga chinfel ka duh. Ka taksa a chau tawngkhawng deuh a, hei vang hian ka phurna pawh ka hloh deuh a ni. Thla kalta ai kha chuan ka chak tha tawh zawk a, ka rilru put hmang pawh a dik cho turah ka ngai," tiin inkhel tura a inpeih tawh thu a sawi.

Murray tun hnaiah a khel tha a, a game khelh hnuhnung 56 atangin game 52 a chak thei a ni. Hei mai bakah kumin title 7 lai a la tawh nghe nghe. Murray chungchang sawiin Nole chuan, "A tan chuan kum tha tak a ni a, Tennis a khelh tawh china a khelh that ber tum ni hialin ka hria. A khel tha tluang em em a, world no 1 ni chunga kum khar pawh a phu hle," tiin a elpui Murray lakah rilru chhia a pu lo.