Mizoram Premier League tantir atanga vawiin thlenga fixture en chakawm ber ni thin chu Dinthar FC leh Chanmari FC te inhmachhawn hi a ni thin. McDowells No 1 Soda Mizoram Premier League Round 6-ah Dintahr FC chuan Lalramliana goal hmangin si khat faiin Chanmari FC an hneh.
Season bul tan tha lo tak Dinthar FC hian kum dang angin player an nei tha tawh lo niin sawi thin mahse Coach Lalremtluanga hnuaiah team tha an nih zia an rawn tarlang chho zel a. Champion lai Aizawl FC an hneh hnuah an hmelma Chanmari FC an hneh leh ta. Table-ah palina an ni ta a ni.
Dinthar FC 1-0 Chanmari FC
Lalramliana 76'
Red Card : C. Lalrosanga (Chanmari FC)
Dinthar FC XI : MCA, Felpuia, Lalhima, Tlanga, VL Tluanga, Paula, Ramtea, Nunsanga, Isaka, Mapuia, Samuela.
Chanmari FC XI : MSA, Rozama, Rosanga, Rinchhana, Achia, Reubena, Johny, Mawitea, Joseph, Danmawia, Ramenga.
Red card a chawi avangin Chanmari FC chuan an striker Malsawmfela an chhawr thei lova, a aiah Zara chuan Ramenga a khelhtir a, first half-ah inkhel hmuhnawm tak kan en, goal erawh a lut lo. Dinthar FC lamin goal khungna chance tha tak MSA tihsual zarah an nei, Mapuia chuan a pet goal teuh hle, mahse Rinchhana chuan a lo petchhuak hman hlauh mai.
First half-ah Chanmari FC chuan an player an chan, Rosanga chuan yellow card pahnihna a hmuh avangin hnawhchhuah a ni a, kim lovin Chanmari FC an khel chho tan ta. Dinthar FC an khel tha tawlh tawlh a, second half hun tawp dawn minute 15 la awm tihin goal an khung ta nge nge.
Lahima atanga ball chhuak tha tak chu Samuel-a chuan dawngin, a tlanpui a, a vawrh ta. Ramtea chuan chiang takin a tauh lut ta. Si khat faiin Dinthar FC chuan hma an hruai. Chanmari FC hi tlem zawk ni mahse tlawm an tum lo hle, Reuben-a leh Chhinga te chuan goal khungna chance tha tak nei mahse Dinthar FC goalkeeper MCA a che tha, a lo dang zel, hun tawp thlengin Dinthar FC chuan goal an chhuah ta lo, si khat faiin hnehna an chang ta a ni.
Dinthar FC hian season bul tan chhe hle mahse khelh 6 atangin point 8 an hlawh chhuak ta a, table chung team lian pahnih an hneh avangin MPL table-a hmahruai fal tur an pawt ding kan ti thei awm e. Luangmual FC leh Bethlehem Vengthlang FC te nan point 8 an nei tlang a. Chanmari FC hian khelh 6 atangin point 12 an nei a, Aizawl FC hnuaiah pahnihna an ni chhunzawm a ni.