October ni 25, Thawhleh zan khan MPL5 Round 8 match hnuhnung ber khelh a ni a, Mizoram Premier League Champion hmasa ber Dinthar FC chuan si hnih faiin Bethlehem Vengthlang FC an hneh. He inkhelah hian Dinthar FC striker Michael Lalremruata chu Man of the match-ah thlan a ni. Dinthar FC hian point 7 neiin table mawngphah an chhuah san ta a ni.

Dinthar FC 2-0 Bethlehem Vengthlang FC

(Lalruatpuia 9', Michael Lalremruata 11')

MoM:- Michael Lalremruata (DFC)

Dinthar FC XI :Joseph, Titima, B Hammed, Steve, Zuala, C Carter, Saitea, Biaknia, Ruatpuia, Michael, Alay

Bethlehem VT FC XI: Mala, Hmingtea, Dinpuia, Hlimtea, Malsawma, Tuka, Sangkima, Rinsanga, Apuia, Mawitea, Pca

MC Dowell's No Soda Mizoram Premier League Season 5 phase 1-ah Bethlehem Vengthlang FC hian si hnih faiin Dinthar FC hi an lo hneh tawh a, Phase 2-ah erawh Dinthar FC an chungnung ve thung a ni. Bethlehem Vengthlang FC hian MPL5 Phase 1 kha an hmang tha hle a, table chung berahte an awm, mahse Champhaiah an che fuh lova, chu chu AR Lammualah an chhunzawm ta a ni.

Dinthar FC hian Nigerian defender Balogun Hammed, midfielder Clarence Carter Ezebube leh Champhai atanga an lak goalkeeper Joseph C Lalruatfela te chu an chhawr nghal a. Bethlehem Vengthlang FC pawhin Ramhlun North FC atanga an lak luh Mawitea an chhawr nghal bawk. Dinthar FC-in an player lak tharte an chhawr tangkai nghal a, point 3 an hlawhchhuak nghal a ni.

First half tan atanga minute 9 lekah Dinthar FC chuan corner an hlawh chhuak a, Corner hi Saitea chuan petin Bethlehem Vengthlang FC defender ten an clear thei lo. Tin, Bethlehem Vengthlang FC goalkeeper Mala chuan ball a man thi mai dawn emaw tih laiin a thlauh bawk nen, hei hi Dinthar FC winger Ruatpuia chuan a tauh lut ta a, si khat faiin Dinthar FC chuan hma an hruai ta.

Goal a luh atanga minute hnih pawh a ral hmain Dinthar FC chuan Michael Lalremruata hmangin goal an khung leh ta mai a. Lalruatpuia chuan veilam sirah ball khalhin, box laia awm Michael-a tan a siam sak a, Michael-a hian harsatna nei miah lovin bottom corner-ah a pet goal ta a ni.

Bethlehem Vengthlang FC hian midfield-ah chungnung zawk ni tum hle mahse Dinthar FC player thar Carter a hnawk hle a, a ball khuap a thain tharum a ngah bawk si a, Bethlehem Vengthlang FC midfielder ten an khan lo deuh thin a ni.

Bethlehem Vengthlang FC hian thei tawpin dinglam leh veilam sir atangin nawr mahse Dinthar FC full back-te an che tha a, a bik takin right back Steve-a a langsar leh hle. Minute 15 a la awm tihin chhum a zing nasa lutuk a, inkhel chhunzawm theih a ni lo, minute 7 vel an chawlh hnunah chhunzawm a ni leh a, goal a luh belh lo, si hnih faiin Dinthar FC chuan hnehna an chang ta a ni.