Manchester United winger Angel Di Maria chuan tun atanga darkar 24 chhung hian PSG-ah medical test a nei dawn.
British Football chanchin a player man to ber ni turin United hian season kalta khan £59.7m laii Di Maria hi Real Madrid atangin an lalut a, mahse Di Maria hian beisei a phak thei meuhlo ani.
Kum 27-a upa Argentina winger hian Copa America a khelh zawh hnuah United team te chu a zawm duh lova, PSG lam nen inbiakna nei rengin PSG lam hian £46m in an lalut dawn ta niin BBC lam chuan an tarlang.
Di Maria hian United tan bul tan tha viau in goal bakah assist te a rawn nei chho nghal a, mahse season laihawl lamah hniamlam pan in March 9 a Arsenal in FA Cup a an pet tlak hnu phei kha chuan United tan hian a start pha ta meuh lo a ni.
PSG lamin Di Maria an lakluh dawn tak avang hian Di Maria thlaktu atan hian Pedro hming a langsar ta ber a, Pedro hian hmun a chan hleihtheihlohna Barcelona chhuahsan in United lam hi a pan ngei hmel ta hle.