Manchester United defender Marcos Rojo chuan ram leh club-a a team-mate Di Maria chu khawvela Footballer ropui ber pakhat Lionel Messi aia a hniam bikna a hriat loh thu a sawi chhuak.

Nikum nipui bazarah khan Man Utd chuan Real Madrid atangin £59.7million laiin Di Maria hi an lei a, inhliam vang leh chhungkaw lam harsatna vang leh league danga a insawn avangin season khat chhungin a insiam rem hman lo, hemi chungchang hi Rojo chuan sawi chhuakin,

"Mipui hian league dang atanga a insawn avanga a insiam rem lawk theih loh thu hi an theihnghilh a ni. Tin, a man a to a, chuta tang chuan an teh bawk. England chu Spain nena khaihin chuan a danglam khawp mai. Tharum a ngai hnem. Di Maria hi khawvela tha ber pakhat a ni thin, Messi leh Ronaldo te aiin a hniam bik chuang lo. Season tharah chuan ropui takin a khel ngei ang tih hi ka chiang a ni," tiin Rojo chuan a sawi.

Argentina hian Copa America final lutin, Pathianni zing dar 1:30 hian a thlengtu Chile nen final an khel dawn a, Di Maria hian final an luh theih nan tha a thawh hlawk hle a, semi final-a 6-1 laia Paraguay an hnehnaah goal hnih a khung bakah a thiante goal khung tur a siamsak bawk a ni.

Rojo chuan Man Utd-a an manager Van Gaal chu fiamthu duh tak, nelawm tak ni mahse a eizawnna a hriatchian thu leh Pa khawng tak a nih thu a sawi a. Team thatna bakah mimal tin hmasawnna ngaihtuah mi a nih avangin United chu trophy reilote chhunga a lakpui ngei a rin thu Rojo hian a sawi a ni.

Nikum nipui khan Manchester United chuan Sporting Lisbon atangin he Argentine defender Rojo hi £16m in an la a, United player tangkai ber pakhat a ni chho ngei dawn niin a lang.

source : Mirror