ISL club Delhi Dynamos chuan kum 33 mi Spaniard goalkeeper Dorronsoro Sanchez an lakluh thu an puang.

Sanchez hi Delhi Dynamos foreign player lakluh pathumna niin, Rene Mihelic leh Marcos Tebar-te an lo lalut tawh.

Sanchez-a club hnunhnung ber hi Spanish second division club Lorca FC niin, season hnih chhung Lorca tan hian Sanchez hian game 82 lai a khel.

Albacete, Alcorcon leh Alcoyano tante lo khel tawhin Albacete-a a khelh lai hian kum 2014 khan Spanish second division B-ah a champion a ni.

Sanchez chuan, “Ka career-ah hunthar ka tawnga ka phur em em a, Indian Super League hi a thang chak hle a, Spanish player leh Spanish coach tam tak an awm bawk. Anni hian he league chungchang hi ka hnenah an sawi nasa a, an fak em em a, he league-a ka rawn lut thei hi ka lawm hle a ni, “ a ti.

Delhi Dynamos head-coach Josep Gombau chuan Sanchez an lakluh chungchang sawiin, “Dorronsoro Sanchez hi goalkeeper tawnhriat ngah tawh tak a ni a, kan squad a ti phuisui hle dawn a ni. Goalkeeper naupang zawkte tan a tangkai hle dawn bawka, amah atang hian an inzir thei dawn a ni. Goalkeeper tha tak a nia, pre-season khelh tan a ni tep tawha, Sanchez hi kan hmu chak tawh hle a ni,” a ti.

Sanchez hian Delhi Dynamos goalkeeper dang Albino Gomes, Sukhadev Patil leh Sayan Roy-te a zawm dawn a ni.