Indian Super League club Delhi Dynamos chuan Mizo tlangval Daniel Lalhlimpuia chu an lalut.
Kum 20-a upa Lalhlimpuia hi kum thum chhung chu Bengaluru FC ah a awm tawh a, 2017/18 season tawp rualin a club hi a chhuahsan a, Delhi hi a zawm ta a, Dynamos-ah hian kum hnih awm turin contract a ziak a ni.
Lalhlimpuia chuan, “Delhi Dynamos ka zawm thei hi lawmawm ka ti hle a, he club hian player naupang zawkte tan hun tha an siamsak nasa a, hei vang hian ka tan chuan duhthusam a ni a. He club-ah hian kum tam tak chu hlawhtlinna hmel hmuh theih ka inbeisei a ni,” a ti.
2007-a Chandigarh Football Academy atanga inchher tan Daniel Lalhlimpuia hi 2011 khan India aiawhin a tel tan a, 2011 SAFF U-16 Championship a khel a. 2013 khan AIFF Elite Academy ah a lut a, kum hnih chhung a awm a. 2016 khan national team-ah khel tan a, India leh Puerto Rico inkhelh tumin a khel ve a, Sunil Chhetri a thlak a, India hi 4-1 in an chak nghe nghe a.
2017 khan India XI ah a vawikhatna atan bul a tan a, Cambodia leh India an inkhel a, India hi 3-2 in an chak a ni.
2015 khan Bengaluru FC chuan an lalut a, a luh tirh atanga an inthen thlengin game 49 zet a khel a, goal 7 a thun a. Kum 18 leh thla 6 a nihin I-League match an khel a, Kanteerava-ah Mumbai FC nen an inkhelh tumin Bengaluru tan Daniel Lalhlimpuia hian goal a thun a, Blues hi a chakpui a, goal thun thei naupang ber a ni nghe nghe.
Khelhna hmun a chang tam lo hle a, hei vang hian 2016 Indian Super League khel turin Chennaiyin FC chuan hun rei vak lo chhung chu loan in an la a ni.
Kum thum chhung Bengaluru FC a awm chilh lai hian an club hlawhtlin theihna bulpui pakhat a ni a, Blues hian BDFA Super Division, I-League, Indian Super League, AFC Cup, Super Cup leh Federation Cup te an khelh chhoh avangin player an indaih lo hle a, an inthlak kual nasat phah hle a. Player lar deuh an remchan loh chang pawhin Lalhlimpuia hi an hmun ruak luah khattu atan a remchang thei zel a, a tangkai hle.
Serchhip tlangval hian a khelh tam theihna tur zawn a duh vanga Bengaluru FC hi chhuahsan a ni ber a, hmun chan tam theih beiseina sang tak nen Delhi Dynamos hi a pan ta a ni.
Delhi Dynamos hian 2017/18 kha an khar tha lem lo hle a, league-ah 8-na an ni a, match 8 chhung chu chak hmel an hmu lo nghe nghe a. 2018 Indian Super Cup qualification spot an chang pha lo a, season tharah chuan dinhmun tha zawka an din theih an inbeisei a ni.