Australian boxer Taylah Robertson chu Commonwealth Games vawi 21-na an tan chauh a, boxing ring chhung a luh hma hauhin medallist ni nghalin, CWG ah chuan medallist hmasa ber a ni.

Kum 19-a upa Taylah Robertson hi 51 kg category-ah a tel a, a bye avangin semi final a lut nghal a, hei vang hian a chhe berah bronze medal chu a dawng dawn tho tihna a ni a. Inhnek miah loin ram tan medal a hawn thei nghal a ni.

Taylah Robertson chuan medal dawng thei nghal dinhmunah ding mahse chu ringawt chu a duhtawk mai loh tur thu a sawi a. Bronze chu lungawipui mai loin theihtawp chhuaha a beih tur thu a sawi a, gold medal lak ngei a duh thu a sawi.

“Gold medal dawn ngei ka duh a, hemi tur hian theihtawp ka chhuah ang a, bronze medal ringawtah ka lungawi dawn lo a, ring chhungah theihtawp chhuahin a chungnung ber nih ka tum dawn,” a ti a.

“Medal dawn chu duhthusam a ni a, eng medal ber nge tih erawh ngaihtuah chian a ngai a. Ka inbuatsaihna zawng zawngte ka ngaihtuah hian gold medal lo chu a tih chi loh a. Semi final-ah hian tu ber nge ka hmachhawn dawn a hriat loh a, tu pawh chu ni se ka inpeih hle a ni,” a ti bawk.

Robertson hian April 13 hian Oxenford Studio-ah ring a luhchilh dawn a ni.