Brazil chu hmeichhe tana buatsaih Copa America-ah an champion a, he tournament vawi 8 an khelh tawhah vawi 7 an champion ta.

An champion hma hian Brazil chuan game hnih khelhah point 6 an hmu a, Chile chuan Argentina chu 4-0 ngawta an hneh avangin umpha thei tur an awm lo a, an champion theih phah ta a ni.

Copa America champion an nih mai bakah hian France rama 2019 World Cup khelh turah an tling nghal bawk a. Chu mai a la ni lo a, 2020 Tokyo Olympics atan pawh an tling bawk a ni.

He tournament hi a la tawp mai lo a, Brazil pawh hian khelh tur an la nei a, Colombia nen an la inhmachhawn ve leh dawn a. Amaherawhchu, an result chu eng pawh ni se khawi ram mahin an lehpel thei tawh chuang lo a. Tun dinhmunah Brazil hian point 6 an nei a, anmahni hnaih bertu Chile chuan point 4 hmuin, pathumna Argentina chuan point 3 an hmu a. Colombia phei chuan point 1 chiah an la hmu ve a ni.