Mizoramin Coach hmel thar kan hmu e, Aizawl FC an hneh kha vanneih vang pawh lo ni tehreng se, an player tha leh coach chhuhsaktu Chanmari FC leh zel an hneh takah kha chuan vannei tiin kan sawi thei tawh lovang.
Mizoram hian Football coach tha tak tak hmel kan lo hmu tawh thin, Thlanga, Mala, Didina, Joseph, Chawnga leh Zara te hming bakah R. Lalremtluanga hming hi kan lam tel chho tawh dawn e.
Local Football-a ngel nghet taka an kal theih chhan chu Dinthar FC hian sum hman tawk chin an hria a, club dangin reilote chhung atan sum tam tak sen huam mahse Dinthar FC erawh chuan Mizoram economy leh Local Football kalpui dan tawk an hre tlat, hetih lai hian club dang aia hlawh an pek hnem theih loh avangin ? An player tha tak tak an chan ta nual mai.
Mizoram Premier League hmasa berah champion ni mahse an hniam lam a pan tual tual. McDowells No 1 Soda Mizoram Premier League (MPL Season 4)-ah pawh season bul an tan tha lo, Dinthar FC chu an ral tawh mai dawn emaw mipuiin an ti hman. Pu R. Lalremtluanga chuan player naupang a khawm a, Team insiamrem mek ni mahse MPL club lian pahnih an hneh thei tlat mai le.
September ni 29, 2015 khan Dinthar FC chuan 2-1 in Champion lai Aizawl FC an hneh, Brandon VL Remdika chuan 6th mins lekah Aizawl FC goal khung mahse Tlangthanpuia leh Lalkhawpuiamawia te hmangin Dinthar FC hian hnehna an chang. October ni 9, 2015 khan Chanmari FC chu si khat faiin Dinthar FC hian an hneh leh bawk a, Lalramliana chuan 76th mins-ah goal awmchhun leh chakna goal a khung a ni.
Season bul an tan that loh avangin an relegate mai ang tih hlauhawm khawpin table mawng lamah an awm. Mahse MPL 4 season chanve khelh a ni chho mek a, Game 6 atangin point 8 an hlawhchhuak ve ta der mai. Vawi hnih hnehna an chang a, vawi hnih an khingpui an hneh loh bakah vawi hnih an khingpui an inhnehtawk pui a ni. Table-ah 4-na an ni mek a, semi final khel thei dinhmunah an ding mek.
Aizawl FC leh Chanmari FC an hneh avang hian fak chiam chiam chi an ni lo, Round dangah an rawn chak chho zel ang tih pawh kan sawi thei lo. Kan hriat reng tur chu team thar din an ni a, coach thar leh player thar nen, tun season chu an buai chho ve nak nak dawn. Mahse kan hmuh chian em em erawh Aizawl FC leh Chanmari FC an hmachhawn danah khan Remtluanga hi coach tha tak a ni chiang mai tih hi a ni.
Pu R. Lalremtluanga hi Aizawl Venghnuaia piang leh seilian a ni a, nupui fanau neiin Venghnuaiah an khawsa mek. Naupan lai atanga inkhelh ngaina leh thiam em em thin a ni a, Navy School-a luh theihna chance tha tak nei mahse a chhungte avangin a zawm ta lo a ni.
"Ka school kalna apiangah football thiam tia sawi chu ka ni ve thin. Pawl li ka nih laiin Col. Sangzuala nupui hian Football khel tura Navy School-a min dah a tum a, mahse fapa mal ka nih avangin ka piin a phal ta lo, tun thleng hian ka ui ve thin khawp mai," tiin Remtluanga chuan inkhel.com a hrilh.
1999 khan Local football club Rangers FC a din a, veng chhung leh veng thenawma talent nei tha tak takte a khawm. 2001 khan Aizawl District Football Association hnuaiah third division-ah an inziak lut a, ADFA tournament-ah club 100 chuang zingah final a luhpui nghe nghe.
Remtluanga chuan coaching lam a luhchilh tak tak dan sawi chhunzawmin," 2005 khan mamawhna avangin FC Kulikawn chuan an club-a khel turin min sawm a, I-Day leh MFA Cup te kan chawi, hemi hnu hian coaching lam ka luhchilh chhunzawm ta a. Venghnuai Games Association ka enkawl a, khami tuma ka player enkawlte te team ka enkawl tawh zingah chuan an la chhe ber ang. Mahse Mizoram 2nd Division Tournament leh Aizawl South Zone-ah kan champion tlat a ni," tiin.
2007 khan AFC 'C' License a zova, 2013 khan 'B' License a zo leh a, 'A' License neih tumin Remtluanga hian tan a la mek a, "A License tih leh tumin kawng ka zawng mek. Sponsors avangin kumin khan ka tlai a, nakum lamah Pathianin rem a tih chuan ka la ti ve ang chu." tiin a sawi a, inkhel.com-in sawrkar emaw MFA lam atang emawa puihna a dawn leh dawn loh a zawhna chu,
"Tuna ka license neih theih nan hian puihna ka dawng lo, 'A' license erawh ka u, ka naupan lai atanga min kahruaitu Pu Tea'n min tum sak dawn a, ka lawm khawp mai," tiin a chhang.
inkhel.com chuan MPL player tha a tih ber a zawhna chu,"Kum hmasa lam khan Rohmingthanga (Aizawl FC) kha tha ka ti khawp mai, kuminah erawh Bethlehem Vengthlang FC striker Dawngtea'n ka mit a la tlung ber," tiin a chhang. Remtluanga hian State pawna khel Mizo player zingah Shillong Lajong left back Adinga tha a ti ber a, a club tan ber chu Bayern Munich a ni.
Mizo te tan Football hi eizawnna tlakah i ngai em ? tih zawhna chu,"Tehreng mai," tiin a chhang a, Mizoram Football-a hma kan sawn theihna tur chuan technique lama kan that a ngaih thu a sawi bakah kum 8 atanga kum 15 inkar an nih chhungin training tha taka lak a pawimawh a ti bawk. Tin, coaching line-a kal turte tana pawimawh a tih zingah mahni inrintawkna, football tuichilhna leh tunlai game mil zela mahni intuaithar a nih thu a sawi bawk a ni.