Hrem vangin an coach Chawnga'n enkawl thei lo mahse Bethlehem Vengthlang FC chuan 2-1 in Ramhlun North an hneh a, Laldinliana Varte goal chu Lalremruata'n Ramhlun North FC tan rul mahse hun tawp dawn minute li a la awm tihin Vanlalzuia chuan Bethlehem Vengthlang FC chakna goal a khung.

Mizoram Premier League season 6 Round 5 match hmasa berah hian PC Laldinpuia (Bethlehem Vengthlang FC) chu man of the match-a thlan a ni a, khelh 6 atangin Bethlehem Vengthlang FC hian point 8 an hlawhchhuak ta a ni.

Bethlehem Vengthlang FC 2-1 Ramhlun Nort FC

Laldinliana Varte 16', Vanlalzuia Hnamte 86') (Lalremruata 46')

Bethlehem Vengthlang FC XI : Lalruatpuia, Laldinliana Varte, PC Laldinpuia, PC Lalthazuala, Vanlalthanga, MS Dawngzela, Lalnuntluanga, Vanlalzuia Hnamte, K Lalnunzama, Ramengmawia, Israel Laldingngheta,

Ramhlun North FC XI : Lalrinhlua, Lalramzauava Khiangte, Malsawmtluanga Ralte, Lalremruata, Toky Zomuanpuia, C Ramdinmawia, Lalrinfela, Lalmuanawma, Lalfelpuia, Rosangliana, Harry Delano

Bethlehem Vengthlang hian Chanmari West an hneh hnuah Mizoram Police PC leh Dinthar FC an draw-a, Chhinga Veng 2-0 in an hneh lo. An coach Chawngthansanga chu hrem a nih avangin technical area-ah awm ve phalsak a ni lova, heti chung hian Ramhlun North an hneh ta tho a ni.

Ramhlun North hian coach Samson Ramengmawia hnuaiah Aizawl FC an draw hnuah Dinthar FC  an hneh a, Chanmari West FC , Chanmari FC leh Bethlehem Vengthlang FC an hneh lo, match 5 khelhah point 4 an nei mek.

Goal hmasa ber hi 16 mins-a lut a ni a, mual dinglam sir atanga Lalthazuala ball vawrh tha zet chu Dina Varte hian box chhungah lalutin hmahruaina goal a khung. First half-a si khat faiin Bethlehem Vengthlang FC hian hma an hruai.

Second half tantirah Bethlehem Vengthlang FC goalkeeper Ruatpuia ball man per chu Lalremruata chuan nangchingin an siphurh rulh nan a hmang. 1-1 in an inhnehtawk tawh mai dawn nia a lan hnu 86 mins-ah Bethlehem Vengthlang FC chuan free kick an hlawhchhuak a, he free kick hi Vanlalzuia Hnamte chuan pet goal-in he goal hi an chakpui ta a ni.

He match-ah hian goal mouth action a awm nual, Nuntluanga shot tha zet chu inkhelh tir lamah Ramhlun North Goalkeeper Rinhlua chuan a dansak. First half tawp dawna Ramenga ball vawrh tha zet Dina Varte pet thelh kha chu pet fuh ngat selang chuan a goal chiang khawp ang le.

Bethlehem Vengthlang FC hian inkhel an thunun zawk a, Vanlalthanga shot tha tak chu second half tir lamah Rinhlua'n a dan sak, Ramhlun North FC pawh hian goal hnih khungna chance an nei a, Jesse corner pet tha tak chu a goal hman teuh hle a, Ruatpuia'n a lo dang a ni.

Ramhlun North FC hian September ni 29, Ningani tlai dar 3:00-ah Chhinga Veng FC an hmachhawn leh ang a, Bethlehem Vengthlang FC hian Ningani zan dar 7:30-ah Chanmari FC an hmachhawn leh ang.

Reporter : PC Lala