Pathianni khan Manchester City chuan Real Madrid atangin £26million-in Danilo an lalut a, kum 5 chhung atan contract an ziahpui.

Kar hmasa khan Kyle Walker lei tawh mahse Manchester City chuan Brazilian right-back hi an lei leh ta thova. Tin, Monaco left-back Mendy pawh Manchester City hian an la leh mai dawn niin bbc chuan a tarlang, Mendy an lei leh a nih chuan City hian tun nipui bazarah hian £200million chuang player lei nan an hmang dawn tihna a ni.

"Manchester City ka zawm thei hi ka hlim tak zet a ni. Club engemaw zatin min duh, hetih lai hian Pep Guardiola-a hnuaia khelh hi ka chak em em thin a nih avangin City-in min duh tih ka hriat khan awlsam takin ka aw nghal a ni.

"Tun kar lo awm turah hian team-mate thar te ka hmu dawn a, bul tan ka chak tawh tak zet a ni," tiin Danilo Luiz Da Silva chuan Manchester City club website a hrilh.

Kum 26 mi Danilo hi hmun hrang hranga chhawr theih a ni a, full-back-ah a chhawr theih rualin holding midfield-ah pawh a hman theih bawk.

Manchester City hian USA-ah pre-season tour an nei mek a, an match hmasa berah an hmelma Manchester United si hnih faiin an hneh lo, Ningani zingkarah Real Madrid nen an inhmachhawn leh ang.