2016/17 season an hman zawh rualin Premier League-a pathumna Manchester City chuan £43m laiin Monaco midfielder Bernardo Silva an lalut nghal hem mai.

French champions Monaco midfielder hian July ni 1-ah Manchester City hi a zawm ang. Kum 22 mi Portuguese attacking midfielder Bernardo chuan, "Tunah chuan khawvela team tha ber pakhatah ka awm ta e," tiin City a zawm thei chu a lawm zia a sawi.

Silva hian tun season liamta khan Monaco tan game 58 khelin, goal 11 a khung bakah assist vawi 12 lai a nei bawk a. Champions League-a Manchester City an hmachhawn tum pawhin a inlan nghe nghe a ni.

Euro 2016 khelh chak hle mahse hnawl a ni a, mahse Monaco tan ropui takin a khel, Ligue 1 title a lakpui hnuin Manchester City chuan to takin an lei a, comback ropui a ni chiang e.

"Guardiola hnuaia inkhelh theihna hun tha i hmuh chuan i hnar phal bik hauh lovang. Khawvela coach tha ber a nih loh pawhin coach tha ber zing ami a ni chiang e," tiin Portugal tana vawi 12 lo inlan tawh Silva chuan a sawi.

Silva hi Tottenham defender Danny Rose pawhin hmachhawn harsa a tih ber pakhat a nih thu a sawi, Spurs midfielder hlui Jermaine Jenas chuan City-in Silva an lalut hi mak a ti hle a, a position-ah hian player tha tak tak an awm, hetih laia Pep-a'n a lalut chat hi chu plan tha tak a neih a ring a ni.

Transfer marker a ropui dawn, a bik takin English club an che na dawn niin a lang. Manchester City hian Champions League an khel dawn a, tun season liamta erawh title an la lo. Hei vang hian season zawh rualin player tha an lalut nghal.

Manchester United pawhin sum tam tak hman an tum leh dawn niin a lang. Liverpool pawhin champion tuma beih an tum leh ngei dawn a, hetah han player hrawl tak an ngaihven mek niin English media te chuan an tarlang bawk. Kum dang zawng aiin tun nipui bazarah hian English club-te an che na dawn niin a lang.

Source : bbc