November ni 9, Ningani zan khan Mizoram Premier League Season 6 Round 13 na Chhinga Veng FC leh Bethlehem Vengthlang FC ten an khel a, Chhinga Veng FC chuan Lalrammuanpuia (Apuia) goal khat hmangin Bethlehem Vengthlang FC an hneh. Goal awm chhun hi first hlaf  huntawp dawn minute 42-a lut a ni. He inkhelah hian Chhinga Veng FC midfielder Lalrinchhana chu Man of the match-ah thlan a ni.

Phase 1 Round 4-ah team pahnih te hi inhmachhawn tawhin Chhinga Veng FC hian 2-0 in anhneh tawh a, an intawn vawi hnihnaah Chhinga Veng FC bawk an chungnung  zawk a ni.

Bethlehem Vengthlang FC 0-1 Chhinga Veng FC

(Lalrammuanpuia 42')

Bethlehem Vengthlang FC hian coach thlakna tur anla hmuh loh vangin assistant coach Benjamin Lalhriatpuia chuan enkawlin a zawnin match nga an chak tawh lo a, Khelh tawha vawt li hnehna chang tawhin vawi thum draw an nei a, vawi ruk tlawm tawhin point 15 nei mek a, match khat khelh hmabak an la nei a, November ni 17, Zirtawpni tlai dar 3:00-ah Chanmari West FC an hmachhawn leh ang a, hnehna chang mahse, semifinal luh an tan thil harsa a ni tawh.

Semifinal lut chiang tawh Chhinga Veng FC hian coach Lalsangzuala hnuaiah  Aizawl FC chiah hneh loh an nei a, point 30 nei tawhin hmahruaitu an ni chhunzawm zel a ni.

First half-ah Chhinga Veng FC chuan inkhel thunnun zawk mahse, goal erawh an thun mai thei lo a, Lalrammuanpuia (Apuia) leh Dawngtea chuan Bethlehem Vengthlang FC keeper Ruatpuia tan hna hautak an siam lo. Bethlehem Vengthlang FC pawhin goal thunna hun nei ve bawkin K Lalnunzama chuan a hun tha neih a hmang tangkai bik lo.

Goal lut lo in chawlh lawk an hmang dawn emaw tih hnu huntawp dawn minute 42-ah Chhinga Veng FC chuan an hun tha neih hmang tangkaiin box pawn a tang a, Lalrammuanpuia (Apuia) goal shot tha zet chu Bethlehem Vengthlang FC keeper Ruatpuia dinglam sirah mawi takin a lut a, he goal hi chak nan an hmang zui ta a ni.

Second hlaf-ah Bethlehem Vengthlang FC chuan an siphurh sut ngei tumin PC Zosanga, PC Lalthazuala leh B zothanmawia luh mahse, danglamna erawh an thlen thei lo a, Rammawia chuan an siphurh sutna hun tha a hlah. Chhinga Veng FC pawhin goal thun belhna hun tha neiin MS Tluanga chuan keeper T Mawia chiah a hmachhawn hnuah defender MS Dawngzela (Notea) chuan a dang hman a, Dingngheta chuan goal kham apet per hlauh bawk.

November ni 16, Ningani tlai dar 3:00-ah Chhinga Veng FC hian Mizoram Police FC an hmachhawn ang a, November ni 17, Zirtawpni tlai dar 3:00-ah Bethlehem Vengthlang FC hian Chanmari West FC an hmachhawn ang.

(adsbygoogle = window.adsbygoogle || []).push({});