Thawhtan zan FA Cup quarter-final inkhelah Chelsea chuan FA Cup champion nilai Manchester United an hneh.
He inkhela goal awm chhun hi Kante-a thun a ni a, goal dang a luh belh tawhlo. Conte-a pawlre hian Stamford Bridge-ah a zawnin Manchester United an hneh ta a, an khelmuala an intawn hnuhnung berag 4-0 laiin an chak tawh bawk.
Chelsea 1-0 Manchester United
(Kante 51')
Chelsea starting XI (3-4-3): Courtois; Azpilicueta, David Luiz, Cahill; Moses, Kante, Matic, Alonso; Willian, Diego Costa, Hazard.
Chelsea subs: Begovic, Terry, Zouma, Chalobah, Fabregas, Pedro, Batshuayi.
Manchester United starting XI (4-3-3): De Gea; Jones, Smalling, Rojo; Valencia, Herrera, Pogba, Darmian; Young, Rashford, Mkhitaryan.
Man United subs: Romero, Blind, Bailly, Carrick, Lingard, Mata, Fellaini.
Manchester United-in hliam avangin captain Wayne Rooney leh Martial an chhawr thei lova, hrem avangin Ibrahimovic a inlan thei lo bawk. Manchester United-in Rashford chiah striker chhawr tur an neih laiin Chelsea erawhin squad-ah buaina an neilo thung.
Inkhel tan a nih atangin fans-te thawm a ring nghal hle a, Stamford Bridge chu mipui au thawmin a khat a ni ber mai. Team pahnih ten inkhel nung tak an lantir nghal a, Manchester United-in tan atanga reiloteah corner an hmu nghal. Rojo an a head goal theilo thung.
Team pahnih te an in hlau lem lova, player leh player ang zawng tak pawhin a khat tawkin an in thal deuh thak thak reng a ni. Mkhitaryan-a'n Rashford-a siamsak hmangin pet goal-na hun tha a nei a, goal-ah erawh a chantir theilo thung.
Chelsea-in Hazard hmangin chance an nei veleh a, khelmual lai atanga ball lalutin Hazard chuan Rojo a bum a, goal-ah shot nghalin a lut teuh hle a, De Gea dinglam goal ban hrulah kalin a out a ni. Chelsea an hlauhawm chhunzawm a, Hazard-a laka Herrera a foul hma lawk hian Chelsea tan Cahill chuan a pet goal teuh hle. Corner atanga ball lo kal chu Cahill-a bul takah a tla a, Cahill hian pet nghalin David De Gea hian a save ropui tak zet a ni.
Hazard a langsar a, vawi eng emaw zat Manchester United tlar hnung a chhaih buai a, De Gea tan hna a siam sak deuh reng bawk. United player-te Hazard lakah an foul hnem hle bawk. Minute 35-naah Hazard-a chungah bawk Herrera a foul a, yellow card pahnihna hmuin referee-in a hnawtchhuak. Herrera-a'n red card a hmuh tak avangin United boss Mourinho-a'n Henrikh Mkhitaryan lachhuakin Marouane Fellaini a luhtir nghal.
TV replay atanga a landanin Herrera hi foul niin a lang lova, lines referee-in hmu chiang hle mahse a phar lo bawk a, mahse inkhel thununtu berin red card a phawrh ta tho a ni. United player-ten an thiam thu sawi viau mahse match referee-in a thutlukna a sawh sawn lova, Mourinho erawh nui mahse a lawm lo tih a hriat hle.
Heta free-kick hi Willian chuan petin De Gea-a'n a hneh chhuak a, hetah hian Costa chu De Gea-a lakah foul-in a nghawk lui a, foul ngei tur niin lang mahse referee-in a hamrik a ham lo thung. Chelsea-in an nawr chhunzawm a, goal erawh an thun thei lo thung. First half a tawp a, 0-0 a ni.
Second half tan a nihin Chelsea an kheltha chhunzawm a, inkhel tan atanga reiloteah goal an thun. Willian-a pass dawngtu Kante chuan United penalty box pawh, khelmual lai tak atangin a shot-a a goal mawi hle. De Gea-a'n a rinlohna lamah ball a kal avangin a save hman lo a, minute 51-naah 1-0 in Chelsea-in hma an hruai.
Kante hian Premier League-a a goal thun hnuhnung ber chu Manchester United laka October thlaa a pet goal kha a ni a, nizanah Stamford Bridge-ah United lamah bawk thun lehin chakna goal a ni zui.
Manchester United-in counter attack atanga beih let an tum ve reng a, an hlawhtling teuh thin hle. Rashford-a'n pet goal-na huntha a neih a hlah chu uihawm tak a ni. Rashford hian khelmual veilam atangin ball a lalut a, Cahill a bum zet hnua a shot chu Chelsea goalkeeper Courtois-a'n a dang tha hle.
Chelsea-in United an nawr chhunzawm a, Costa leh Willian ten an chance tha an hlauh a, Coste phei chuan tuma tihbuai lohin corner atanga ball lo kal a tauh goal lo ho hle. Kante a kheltha chhunzawm zel a, Willian-a tan ball tha zet pe in a shoot nghal a, De Gea hian a dang tha leh hle. Chelsea-in an nawr nasat ngaihtuahin goal an thun tam theilo a, United defender-te an fakawm thlawt, De Gea-a'n Fabregas-a pet a save-te chu ropui tak a ni.
Goal thun tumin bei mahse goal an thun belh thei tawh lova, mikhual team an tan ve tlat avangin Chelsea an in goal an thun belh tawh lova, 1-0 in hun a tawp zui. Kante a kheltha a, first half lamah langsar vut lo mahse second half-ah erawh Chelsea player langsar ber a ni chhunzawm a, Costa pawhin a mize ngai a lachhuah zeuh zeuh bawk. Inkhel hmuhnawm tak a ni a, ti ti titam thei tak inkhel a ni bawk niin a lang. Engpawh nise kheltha zawk leh chak phu zawk chu Chelsea an ni.