Mahuma Memorial Cricket tournament chu round 4-na khelh tan a ni leh ta a, Round 4-na match hmasaberah Chanmarians Cricket Club chuan an khingpui Zarkawt Lords chu run 38-in an hneh. He tournament-a hneh loh nei lo awm chhun ni tawh Chanmarians hian harsatna an la tawk meuh lo a, league-a hma an hruaina an sawh nghet zel.

Toss-a vannei Lords-in bat harna pitch a ni tih an hria a, vawm hmasak an thlang. An tifuh dawn niin a lang hman a, an opening bowler Lalmawizuala chuan over 8 a vawmah wicket 4 lain run 21 chiah a pe. Mahse Chanmarians tan K. Lalremruata (run 51) leh Zothansanga (run 39)-te an an ding tlat a, an hnunga miten run tlema zawng rawn thawh bawkin over 40-ah run 199 an siam thei. Batting harsatna hmuna run heti zah siam theih hi thil awlsam a ni lo a, Chanmarians batsman-te an fakawm takzet.

An target umin Lords an bat ve thung a, hma takah wicket an hloh ve bawk. Hetihlai hian run 82 siamtu an captain Michael Lalchhuanawma'n a khel tha takzet a, a team-te a chak pui teuh hle. Michael-a hian he inkhelah hian run siam hnem ber mahse a thiante'n a hnung an zui zawh loh avangin over 40-ah Lords hian run 161 siamin wicket kua an hloh a, an target run hi run 38-in an umpha ta lo a ni. Michael-a hi a tawp thlengin out loin a ding tluan zak a, hei hi tun tournament chhunga inning khata mimal run siam hnem ber record a ni.

Round 4 hi vawiin lamah khelh chhunzawm leh nghal a ni ang a, chak mamawh ngawih ngawih team pahnih Luangmual Cricket Club leh Chaltlang Cricket Club-te an inhmachhawn ang. He inkhela chak lo zawk zawk hi chu dinhmun derthawng takah an ding tawh tura ngaih a ni a, relegation battle anga ngaih theih a ni.