MC Dowell's No 1 Soda Mizoram Premier League Season 5 Round 8 chu October ni 24, Thawhtanni khan khelh a ni a, Chanamri West FC chuan 3-2 in Ramhlun North FC an hneh.  Phase 1-ah Chanmari West FC chuan 2-0 in Ramhlun North FC an hneh tawh a, an intawn vawi hnihnaah 3-2 in Chanmari West FC hian an hneh leh ta a ni. 

(adsbygoogle = window.adsbygoogle || []).push({});

Chanmari West FC hian point 16 nei tawhin table-ah pathumna an ni chhunzawm ta zel a ni. He inkhelah hian Man of the match-ah Chanmari West FC winger Laldampuia chu thlan a ni.

Chanmari West FC 3-2 Ramhlun North FC

(Lalmuanzuala 16,' 76' Laldampuia 45') (Isaac Lalruatpuia 10', Lalremruata 90')

MOm: Laldampuia (CWFC)

Chanmari West FC XI:- Ruatpuia (Mama), Racy, Zauva Hnamte, Awmpuia, Toky, Muansanga, Muanzuala, Danmawia, Dampuia, Lianzama, Reuben.

Ramhlun North FC: XI:- Rinpuia, Muantea, Ruatfela, Muanawma, Chhaia, Ramdina, David Tlau, Anggu, Chhuanpuia, Sawmtea, Isaac.

Chanmari West FC chuan Reuben Zosangpuia chanmari FC atangin an la lut a, first eleven a chang nghal a, Ramhlun North FC chuan Chanmari FC atangin striker Isaac Lalruatpuia bakah 1st division club Venghlui FC striker Lalruatfela la lutin, player thar te hian  goal an khung ve ve a ni.

Inkhelh tan a ni a, team pahnih te an innawr tawn zak zak hnuah Ramhlun North FC chuan an chance neih hmang tangkai hmasa zawkin minute 10-ah David-a ball vawrh luh tha zet chu box chunga awm Chanmari FC atanga an lak luh Isaac Lalruatpuia chuan a pet goal a, si khat faiin Ramhlun North FC chuan hma an hruai. 

Ramhlun North FC hian hma an hruai rei lo,  minute 6 pawh aral hmain Chanmari West FC chuan corner an hlawhchhuak a, Dampuia pet chu Lalmuanzuala chuan tauh goal-in an si phurh a sut. Ramhlun North FC chuan nawr let nghalin David-a chuan goal thun belhna hun tha nei mahse Chanmari West FC keeper Ruatpuia tan hna hau tak a siam lo. 

Chanmari West FC tan Danmawia leh Dampuia pawhin goal thun belhna hun tha an hloh ve bawk. 1-1 in chawlhlawk an hmang mai dawn emaw tih hnu first half tawp dawn added time-ah Lianzama ball vawrh luh tha zet chu Dampuia chuan ti goal-in Chanmari West FC chuan 2-1 in hma an hruai a, half time a ni chhunzawm nghal.

Second half-ah Ramhlun North FC chuan an si phur sut ngei tumin an nawrna hle a,  Chhaia, Isaac leh Sawmtea ten an si phurh sutna hun tha an hloh a Chanmari West FC chuan an player lak thar Tuaitea an khelh tir ta, a thiam a la theihnghilh lo, mahse match fitness erawh a la nei lo tih a hriat.

Minute 76-ah Ramhlun North FC goalkeeper Rinpuia ball pek sual nangchingin Muanzuala bawk chuan Chanmari West FC tan goal a khung leh a 3-1 in Chanmari West FC chuan  hma an hruai a, mahse Ramhlun North FC an la beidawng mai lo, hun tawp dawn minute khat a la awm tihin Venghlui FC atanga an lak thar Remruata chuan goal a khung ve leh a, 3-2 in Chanmari FC chuan hnehna an chang ta a ni.

(adsbygoogle = window.adsbygoogle || []).push({});