Champions League lalpa ti pawh ni ila kan pawm tlang ang, Europe-a club inelna sang ber leh khawvel football inelna level sang ber nia an sawi Champions League-a goal 116 khung thei Ronaldo hi sawi nep pawh tum mah ila a chanchin kan sawi nasat poh leh a ropui zia a lang chiang ting mai dawn zawng a nih hi.

Nizan khan Santiago Bernabeu-ah Champions league round of 16 match-ah Real Madrid chuan 3-1 in PSG an hneh, Ronaldo chuan goal hnih khungin Marcelo chuan goal khat a khung bawk a, Ronaldo hian Real Madrid tan Champions League goal 101 khungin mellung thar century a siam ta tlat mai.

Manchester United tana a khelh lai atanga vawiin thlengin Cristiano Ronaldo hian Champions League goal 116 a khung tling ta bawk a. Ronaldo hian Champions League game hnuhnung 12 atangin goal 21 a khung tling tawh a, tun season-ah game 7 atangin goal 11 a khung tling ta bawk.

Club pakhat tan Ronaldo hian Champions League goal 101 a khung tling a, amah hnaih bertu chu Barcelona forward Messi niin goal 97 a nei a, pathumna chu Raul niin, Raul khan Real Madrid tan goal 66 a khung a ni.

Ronaldo hian 2009/10  atang khan Real Madrid tan khel tanin season tin goal a la khung kim vek a. Real Madrid-a a khelh hnuah season tin goal 10+ a khung tling ziah a, hetianga ti thei player dang an awm lo. Group Stage a khelh zawng zawngah goal a khung vek bawk a, 2017/18 season phei kha chuan group stage match zawng zawngah goal a khung kim vek a, kha kha record a ni nghe nghe.

Ronaldo hian Champions League Group Stage-ah kum 2015-16 season khan goal 11 lai a khung a, kha pawh kha season khat chhunga group stage goal khung hnem ber record a la ni e.

Real Madrid tan Ronaldo hian goal 101 a khung dan hetiang hian :

PSG nen an inkhelh tum khan Benzema chuan Ronaldo pet goal tur vawi khat pawh a siam sak lo mai ni lovin; Ronaldo a pass lo hrim hrim. Hetih lai hian Benzema chu Champions League-a Ronaldo goal khung tur siamsak hnem ber a ni a, Benzema hian vawi 11 lai Ronaldo a assist a, Gareth Bale chuan dawtin vawi 7 a siam sak bakah Marcelo chuan Ronaldo goal khung tur vawi 6 a siam sak bawk.

Season 8 chhunga Champions League-a Ronaldo goal khung dan:

2009/10 - 7

2010/11 - 6

2011/12 - 10

2012/13 - 12

2013/14 - 17

2014/15 - 10

2015/16 - 16

2017/18 - 11

Club pakhat tana Champions League goal khung hnemte :

1. Cristiano Ronaldo (Real Madrid) - 101

2. Lionel Messi (Barcelona) - 97

3. Raul (Real Madrid) - 66

4. Alessandro del Piero (Juventus) - 42

5. Karim Benzema (Real Madrid) - 31

6. Thomas Muller (Bayern Munich) - 40

7. Didier Drogba (Chelsea) - 36

8. Ruud van Nistelrooy (Manchester United) - 35

9. Thierry Henry (Arsenal) - 35

10. Wayne Rooney (Manchester United) - 30

Source : bbc