Mahuma Memorial Cricket Tournament, Suaka Cricket Ground, Sihhmuia khelh mekah Zarkawt Lords Cricket Club chuan an khingpui Kulikawn Cricket Club chu run 22-in an hneh. League match-a khelh 1st division inelna tournament-ah hian ni 17 November hian round 1 match tawp ber chu Chaltlang Sporting Club leh Chhinga Veng Cricket Club-te'n an khel dawn a ni.
Season hmasa Mahuma Memorial Tournament-ah hian Kulikawn chuan final-ah Chhinga Veng hnehin an lo champion tawh a, tun tournament-ah pawh hian rin kai ber pawl an ni.
Toss-ah Lords vannei zawkin bat hmasak an thlang a, bul an tan pangngai viau. An opening batsman pahnih Lalrempuia (run 11; ball 39) leh Jonathan Lalrinchhana (run 21; ball 24)-te'n hma an rawn hruai a, an out hnuah Zorinliana Sailung (run 29; ball 45) leh Partha (run 14; ball 23)-te chuan tlema zawng rawn thawh ve bawk mahse an batsmen dangte'n an thlawp that tawk loh avangin over 31.1-ah Lords hi out zo vekin run 117 chiah an tlin thei.
Tun tournament-a inkhel hmasa lamte thlirin SCG pitch hi bowler-te chet thatna atana duan a niin a lang a, hei vang hian run tlem tak anga lang pawh hum theih a ni tih inkhel hmasa lamah kan lo hmu tawh. Run 117 Lords siam hi over 40 chhunga um atan chuan target sanga sawi tur a ni miah lo a, mahse an khelhna pitch ngaihtuahin engmah sawi lawk theih a ni lo.
Kulikawn bat hun a thleng a, rin lawk ang ngeiin an batsman-te'n khelh harsa an ti. Assam atanga an player chah luh Prasanjit Sarkar pawh a che hleithei lo a, ball thum chiah a hmachhawnah run nga siamin a out nghal. Hetihlai hian a luh rual pui, President's Cup khelh zawh taka Best Batsman-a thlan C. Lalrinsanga chuan a koah mawhphurhna lain ball 85 a hmachhawnah run 38 a vaw chhuak. Rosiamliana Ralte Junior chuan ball 38-ah run 20 vaw chhuak bawk mahse Kulikawn hian over 30.4 thleng chiah an tlin thei a, out fai vekin run 95 an siama Lords run siam hi run 22-in an umpha lo.
Lords tan hian tun season tan hmaa Chaltlang Sporting Club atanga an lak luh, left arm spinner Lalrempuia leh an pace bowler Partha-te chuan an khel tha takzet a, Kulikawn batsman hlauhawm zawng zawng an vawm out vek a tih theih. Marema hian over 6.4 vawmin run 11 chiah a pe a, Kulikawn batsmen panga (5) ngawt a vawm out a ni.
17th November, 2016 inkhel tur -
Chaltlang Sporting Club vs Chhinga Veng Cricket Club