Mizoram Super League (MSL) Season 3 chu March ni 21, Thawhleh zan dar 7 khan Hawla Indoor Stadium, Republic Vengthlangah khelh tan a ni a, Champion lai Khatla TBL chuan 69-67 in Chanmari Hollow BBSP an hneh. March ni 23, Ningani zan dar 7-ah Tuikual South leh Zarkawt BCA te an inhmachhawn ang.

Mizoram Super League-ah a vawi khat nan Hollow an inlan a, an khingpuite champion lai an ni tih an hre lo, an hneh teuh hle nghe nghe a ni.

Chanmari Hollow BBSP-in bul tan tha zawkin, NIS zir chhuak hmasa ber Samuel Lalthlamuana chuan a ho a, State pawn player Mohit Bhadu an kawl bawk. Khatla TBL hi NIS coach H Laldinsanga (Mapuia) chuan ho ve thungin, state pawn player Garry Gill an kawl ve bawk. TBL hi Mapuia hian kum zawnin a lo champion pui tawh nghe nge a ni.

First quarter atangin game a HOT nghal, forward R Lalnunpuia leh guard Vanlalthazuala chuan points 4 score-in; guard Ronald Zomuanpuia leh state pawn player Mohit Bhadu-te chuan points 2 ve ve an score thung. TBL tan coach cum player Mapuia minute 2 hnuah rawn lut mahse; inkhel erawh TBL hian an thunun thei bik lo, forward Vanlalmuana'n points 8 score-in state pawn player Garry Gill chuan points 5 score a khung ve bawk a, first quarter a zawh chuan Hollow chuan 16-15 in hma an hruai.

Second quarter-ah pawh Hollow an thawhhona a that bakah guard Vanlalthazuala a langsar hle nghe nge a, point 11 zet score-in R Lalnunpuia, Lalhmachhuana, Ronald Zomuanpuia leh Mohit Bhadu ten point 2 theuh an score ve bawk. TBL tan Garry Gill leh Vanlalnunsanga langsar hle mahse, midangin an thlawp that loh tuarin, half time a nih chuan Hollow chuan 35-34 an hmahruai.

Third quarter-ah TBL insiam thain, Mapuia'n a naute a rawn ho leh a, TBL game a rawn danglam, an state pawn player Garry Gill chuan points 10 zet score-in Vanlalnunsanga leh Simon H Lalremruata ten an rawn thlawp tha bawk a, hmahruaitu zawkah an tang ta. Hollow te duh angin an che hlei thei tlat lo. Rebounds an lak theih loh bakah first half game an phak tawh lo, third quarter a zawh chuan TBL chuan 51-45 in hma an hruai ta zawk a ni.

Quarter hnuhnung ber a hmuhnawm hle, hmahruaitu zawk awm hlei thei lo, an innawr tawn zak zak a, Hollow tan guard Lalhmachhuana leh Vanlalthazuala te langsar mahse, TBL tan Mapuia leh Garry Gill te an dang zo lo. Hun tawp dawn minute khat a hmuhnawm tak zet, chak thei dinhmunah an ding ve ve, Hollow hian an chance vawi hnih an bawhpelh hlauh a, TBL an chungnung ta, 69-67 in hnehna an chang ta a ni.

Inkhel pumpui thlirin team hnihte an intumtawk em em a, debut match-ah Hollow an khel tha tak zet, champion lai an tlawm mai dawn niin a lang hman, mahse tawnhriat ngah TBL chuan chawhnu lamah an zia an chhuah leh ta nge nge a ni. TBL tan state pawn player Garry Gill a tangkai hle a, an chakna hnar pawh a ni chiang kher mai. Garry Gill hian points 29 score-in rebound vawi 14, assist 2,steel 1-a nei. Vanlalnunsanga pawh a che tha hle, point 13 a hlawhchhuah bakah, 3 points vawi thum a nei va bawk.

Chanmari Hollow BBSP hi an fithness a tha a, bul tan tha mahse an vawi khat MSL khelhna a ni a, tawnhriat ngah lamah TBL an phak lo a ni ber mai. State pawn player Mohit Bhadu an tangkaipui rualin pressure sang a zo lo deuh niin a hriat thung. Mohit Bhadu chuan point 9 score-in rebound vawihnih a la a, Vanlalthazuala chuan point 21 score-in rebound vawi 8 a la thung. Lalhmachhuana chuan point 11 score-in rebound vawi 5 leh assist vawi 5 a nei bawk a ni.

Reporter : PC Lala