Rii & Hawla Inter Village Football Tournament 2017 chu April ni 7, 2017 khan Chhangphut field-ah khelh zawh a ni ta a, Final-ah Zotlang VC team leh Hnahlan VC team inhmachhawnin, Zotlang hian 2-1 in hnehna an chang a, an champion ta a ni.
Zotlang in Semifinal-a an Player zingah Zothanpuia leh Lalhluna tih loh chu a ngai an hmang vek a. Vannunmawia'n goal vengin Ramnunsanga leh K Lalthlahlova te tlarhnunga laiah an awm a, vei lamah Lalruattluanga awmin dinglamah Lalchakzela a awm bawk. Midfield-ah Lalchhanchhuaha leh Sawmpuia awmin an hmaah Zosangzuala a awm a. Tlar hmaah Jeru-a, Lalhmuchhuaka leh Zonunthara te an in tlar bawk.
Hnahlan pawhin Semifinal-a XI zingah Lianhminga awl tir Lalramkima an dah lut a, Thangchhunga aiah Thangroa an dah lut bawk. Semifinal-a tlar hmaa an dah Tlangthanpuia defesive midfield-ah an dah thung. Lalnunpuian a hmun ngai luahin goal a veng a. Defender goal khung thei Saite leh Chullova te a laiah an ding a, veilam sirah Muanpuia awmin dinglamah Thangroa a awm a. Midfield ah Tlangthanpuia, TC Lalhuapzauva leh Ramengmawia te an awm a. Tlar hmaah Zaremsiama Chhangte, Lalramkima, leh Makhuma te an intlar bawk.
Zotlangin inkhel bul tan tha zawk mahse inkhel an thunun rei lo Hnahlan lam insiam rem vatin inkhelh chhung zawngin chungnung zawk tia sawi tur an awm lo ve, an innawr tawn tluan chhuak thak. Inkhelh tan atanga min 19-naah veilam atangin Zaremsiama Chhangte-in ball tha zeta khalh lutin penalty area a luhpui a, changtu nei lo Makima'n pein Makima hian 6 yard a tangin chiang zetin Hnahlan goal khatna a khung.
Hnahlan coachin Semifinala khel tha Lianhminga awltirin Makima a luh tir a a ti sual lo chiang hle. Hemi hnu hian Zotlangin an siphurh sutna hun tha an nei Jeru-an Hnahlan keeper Lalnunpuia chiah hmachhawn tawhin a pet goal lo. Min 29-naah Zotlangin an siphurh Lalhmuchhuaka hmangin a rul a, Chhuakte-a hian Penalty area veilam atangin Lalnunpuia tauh khumin he tournament-a a goal 6-na a khunga ni. Hun chanve hmalamah goal dang a luh belh lo.
Rinlawk ang ngeiin midfield battle a hmuhnawm hle, ball thiam thiau Ramengmawia, Huapa leh Tlangthanpuia te leh Chhantea, Sawmpuia leh Zosangzuala te an in bei tawk hle. Zotlang midfielder te'n an tlar hma te ball tha tak takin pe thin mahse Hnahlan tlar hnung Saitea, Chullova, Thangroa leh Muanpuia te an dingkhawng tlat a, an paltang thei lo. Team pahnih goal keeper pahnih te an khel tha dun tak zet a. Goal ngei tura ngaih tha tak takin an dang nual. Huapa goal shot Vannunmawia save phei chu pui tak a ni.
Zotlang Coach goal khung belh tumin Zosangzuala la chhuakin Zothanpuia a la chhuak a, a tisual lo, Zothanpuia'n mual vei lamah ball changin Chhuaktea tan a pe a, Chhuakte'n penalty area-ah ball tlan luh puiin Jeru-a tan ball duhthusam a pe a, Jeru-an awlsam takin Zotlang goal 2-na Min 78-naah a khung. Goal phur Hnahlanin an nawr zui nghal a, An siphurh sut ngei tumin Makima la chhuakin Sawmtea an dah luh bakah Lianhminga an dah lut bawk. Hnahlan goal nawr ana sawt a, Zotlang tlar hnung Ramnunsanga, K Lalthlahlova, Lalruattlunga leh Lalchakzela te an khel tha tulh tulh bawk. Zotlang defender K Lalthlahlova a khel tha tak zet.
Hun tawp dawnah Hnahlanin free kick an hmu a, Huapa'n goal ah petin Vannunmawia'n tha zetin a dang a, goal teuh tak a ni. Hun a tawp zui a, Rii & Hawla Inter Village Football Tournament 2017 ah a vawikhatna atan Zotlang an champion ta a ni.
LAWMMAN
Champion - Rs. 1,00,000 & Trophy
Runners up - Rs. 50,000 & Trophy
Fair Play - Hnahlan - Rs. 10,000
Best Player - TC Lalhuapzauva, Hnahlan
Top Scorer - Lalhmuchhuaka 6 goals, Zotlang
Best Referee - Lalthangliana
Inkhel Reporter : Jacob Khawlhring