India mipa No. 1 shuttler Kidambi Srikanth chu BWF ranking thar berah a tlahniam a, pasarihnaah a awm.
Kidambi Srikanth hi Badminton World Federation (BWF) ranking hnuhnung ber, April thlaa chhuakah khan World No. 4 a ni a, tuna ranking chhuak thar berah hian a hma aiin hmun thumin a hniam a, pasarihnaah a awm a ni.
Tun kar khan ranking atan hian 2017 Indonesia Open Superseries Premier point an belh tel a, hetah hian Srikanth hian point belh tur a nei lo a, hei vang hian a ranking pawh hian a tuar ta a. June 26 atanga khelh tan tur Malaysia Open-ah chuan Pullela Gopichand zirtir chhuah Srikanth hi a tel thei dawn a, point pawh a hmuh belh theih ngei a rinawm.
2017 a Indonesia a che tha tak HS Prannoy pawh a tlahniam bawk a, a hma aiin hmun nga ngawtin a tlahniam a, 13-naah a awm a. Kerala shuttler hi nikum tournament-ah player ranking sang deuh deuh hnehtu a ni a, semi final-ah chak tura ngaih a nih laiin a che fuh ta lo a ni.
Sameer Verma chu 19-naah a la awm chhunzawm a, Sai Praneeth pawh a hmaa a awmna tho 21-naah a la awm chhunzawm bawk.
Top 50 pawn lamah Parupalli Kashyap chu a awm chiah chiah a, 51-na a ni a, a hma aiin hmun 9 ngawtin a tlahniam a. Subhankar Dey chu 60-na niin, Lakshya Sen chu 69-na a ni a, Sourabh Verma pawh 71-na a ni.
India No. 1 ni thin Ajay Jayaram chu kar hmasa khan US Open-ah a che tha deuh bawk a, a hmaa a awmna aia hmun 39 zeta sangah a chho a, 95-na a ni a. Jayaram hi hun rei tak a inhliam avangin a inkhel thei lo a, hei vang hian ranking-ah pawh a tlahniam nasa hle a, Top 100 pawn lamah a awm phah a. Tunah a rawn inkhel thei leh tan a, Top 100 chhungah chuan a rawn lut leh nghal a ni.
Hmeichhe lamah chuan PV Sindhu leh Saina Nehwal te dinhmun a la danglam lo a, PV Sindhu hi pathumnaah a la awm chhunzawm zel a, Saina Nehwal pawh 10-naah a la awm chhunzawm zel bawk a ni.
Vaishnavi Reddy Jakka chu 53-na niin, Sri Krishna Priya Kudaravalli chu 71-na a ni a, Mugdha Agrey chu 79-na niin, Ruthvika Shivani Gadde chu 80-na a ni bawk a. National champion hlui Rituparna Das chu hmun 29 a tlahniamin 148-naah a awm.
BWF Ranking thar berah hian Denmark shuttler Viktor Axelsen chu No. 1 niin, South Korean star Son Wan-ho leh Chinese shuttler Shi Yuqi te chu a dawttu an ni.