Chelsea chuan Antonio Conte hnuaiah Premier League game thum khel tawhin point kua an hlawhchhuak ta. London club hian Burnley mikhualin 3-0 ngawtin an sawp. Chelsea tan hian Eden Hazard, Willian leh Voctor Moses-te chuan goal khat theuh ang khung a, goal thum aia tamkhung thei an ni. Season hmasaah che chhe mahse season tharah Chelsea thar kan hmuh chhunzawm mek zel e.
Chelsea 3-0 Burnley
(Hazard 9' Wilian 41' Moses 89')
Stamford Bridge-a inkhelah Eden Hazard chuan player tha bik a nihzia a lantir a, Belgian forward hian Burnley player-te lu a tihai takzet. Season hmasaah che tha lo mahse Antonio Conte hnuaiah Hazard-a'n harhtharna a chang mek a, Premier League-ah game 3 khel tawhin goal 2 a khung der tawh.
Burnley hian Liverpool hneh theih mahse Chelsea lakah erawh an che thei lo a ni ber mai. Chelsea tlarhma player-te an khel tha takzet a, Burnley defender-te'n dan ngaihna an hre lo. Minute 10 khelh tlin a nih hmain Hazard chuan Chelsea hma a hruaipui nghal a, box pawn atangin nalh zetin a pet lut.
Burnley lamin ball an chang hman meuh lo, Chelsea lamin na takin an nawr chhunzawm. Hazard hian goal a thun leh nghal teuh hle a, Burnley defender Mee chuan goal line hma hret atangin a petchhuak hman hlauh. Costa chuan goal thun theina hun tha nei mahse Heaton a paltlang zo lo. Chelsea lamin an goal hnihna an thun leh ta nge nge a, minute 41-naah Willian chuan box chhung atangin kawh zetin lei hrulah Chelsea goal hnihna a pet lut.
Second half-ah pawh Chelsea an chungnung a, Premier League kai thar Burnley tan Chelsea player-te an thiam mah mah. Willian chuan corner atangin box pawna Hazard a pass a, Belgian forward hian tha lutuk tak maiin a volley nghal mahse Heaton chuan a dang hlauh, ball per thla hi Terry chuan hnai set sawt atangin a goal kham chungah a pet.
Chelsea hian hun tawp dawn hnaiah an goal thumna an khung leh a, Hazard thlaktu Pedro chuan mual veilam atangin Willian thlaktu Moses tan ball duhthusam a pe a, English winger hian a pet goal chiang hle. Heaton-a'n goal thum chhuah mahse tha tak taka dan a nei nual a, hun pekbelhah pawh Azpilicueta pet goal ngei tura ngaih a dansak bawk.